Vastu Tips : घराच्या सजावटीच्या नादात ‘ही’ 5 झाडं लावण्याची चूक करू नका; वास्तुशास्त्रात मानली जातात अशुभ
घराची सजावट अधिक सुंदर आणि आकर्षक दिसावी, यासाठी अनेक जण घरात वेगवेगळी झाडे लावतात. मात्र, वास्तुशास्त्रानुसार काही झाडे घरात लावणे अशुभ मानले जाते. कोणती आहेत ही ५ झाडे आणि ती घरात लावणे का टाळावे, जाणून घेऊया.

घराची सजावट अधिक सुंदर आणि आकर्षक दिसावी, यासाठी अनेक जण घरात वेगवेगळ्या प्रकारची झाडे लावतात. घरातील हिरवळ केवळ सौंदर्य वाढवत नाही, तर घराला प्रसन्न लुकही देते. मात्र, वास्तुशास्त्रानुसार प्रत्येक झाड घरात लावण्यासाठी शुभ मानले जात नाही. काही झाडांमुळे घरात नकारात्मक ऊर्जा निर्माण होते आणि कुटुंबातील सदस्यांना अडचणींचा सामना करावा लागतो, अशी धार्मिक मान्यता आहे. त्यामुळे घरात नवीन झाडे लावताना त्यांची निवड काळजीपूर्वक करावी, असे वास्तुशास्त्रात सांगितले जाते. चला तर जाणून घेऊया, कोणती ५ झाडे घरात लावणे टाळावे.
काटेरी झाडे
वास्तुशास्त्रानुसार, गुलाबाचे झाड वगळता इतर काटेरी झाडे घरात लावणे टाळावे. अशा झाडांमुळे कुटुंबातील सदस्यांमध्ये तणाव आणि मतभेद वाढू शकतात, अशी मान्यता आहे. तसेच घरातील वातावरणावरही त्याचा नकारात्मक परिणाम होऊ शकतो. त्यामुळे घरात झाडे लावताना त्यांच्या प्रकाराची निवड काळजीपूर्वक करावी.
बोन्सायचे झाड
बोन्सायची झाडे दिसायला आकर्षक असल्याने अनेक जण घराच्या सजावटीसाठी त्यांचा वापर करतात. मात्र, वास्तुशास्त्रात बोन्सायचे झाड घरासाठी शुभ मानले जात नाही. या झाडामुळे व्यक्तीच्या प्रगतीत अडथळे निर्माण होतात, अशी मान्यता आहे. विशेषतः करिअरमधील प्रगतीचा वेग मंदावू शकतो, असे वास्तुशास्त्रात सांगितले जाते.
चिंचेचे झाड
वास्तुशास्त्रानुसार, घरात किंवा घराच्या आसपास चिंचेचे झाड लावणे टाळावे. चिंचेच्या झाडावर नकारात्मक शक्तींचा वास असू शकतो, अशी धार्मिक मान्यता आहे. घराजवळ चिंचेचे झाड असल्यास कुटुंबातील सदस्यांना विविध अडचणींचा सामना करावा लागू शकतो, असे मानले जाते.
दुधासारखा पांढरा द्रव निघणारी झाडे
काही झाडांच्या फांद्या किंवा पाने तोडल्यावर त्यातून पांढऱ्या रंगाचा दुधासारखा चिकट द्रव बाहेर पडतो. वास्तुशास्त्रानुसार, अशी झाडे घरात लावणे टाळावे. या झाडांमुळे आर्थिक अडचणी वाढू शकतात आणि कर्जाचा भारही वाढू शकतो, अशी मान्यता आहे.
सुकलेली झाडे
घरातील एखादे झाड सुकले किंवा त्याची पाने कोमेजली असतील, तर ते झाड बराच काळ घरात ठेवू नये. वास्तुशास्त्रात सुकलेली आणि वाळलेली झाडे अशुभ मानली जातात. अशा झाडांमुळे घरात नकारात्मकता आणि दुर्दैव येऊ शकते, अशी समजूत आहे. त्यामुळे झाडांची नियमित काळजी घ्यावी आणि सुकलेली पाने तसेच वाळलेली झाडे वेळेवर काढून टाकावीत.
(डिस्क्लेमर : वरील माहिती उपलब्ध स्रोतावरून देण्यात आलेली आहे. याच्या तथ्यांबद्दल आम्ही कुठलाही दावा करीत नाही, तसेच अंधश्रद्धेला दुजोरा देत नाही)
