IND vs SA : हार्दिक पंड्याने परफेक्ट शॉट चुकीच्या ठिकाणी मारला, Super-8 च्या पहिल्या मॅच आधीच टीम इंडियाला धक्का
IND vs SA : टीम इंडिया उद्या सुपर-8 राऊंड मधील पहिला सामना खेळणार आहे. टी 20 वर्ल्ड कप 2026 मध्ये भारताची लढत रविवारी दक्षिण आफ्रिकेविरुद्ध आहे. त्याआधी हार्दिक पंड्याच्या एक परफेक्ट शॉटने टीम इंडियाचं टेन्शन वाढवलं आहे.
आजपासून टी20 वर्ल्ड कप 2026 च्या सुपर-8 राऊंडला सुरुवात होणार आहे. उद्या भारताचा सामना दक्षिण आफ्रिकेविरुद्ध आहे. टीम इंडियाने या मॅचची तयारी सुरु केली आहे. टी20 वर्ल्ड कप 2026 मधील ग्रुप स्टेजचे सामने संपल्यानंतर टीम इंडियाने एक दिवसाचा ब्रेक घेतला. त्यानंतर शुक्रवारी टीम इंडिया पहिल्यांदा प्रॅक्टिससाठी उतरली. या सेशनमध्ये प्रत्येकाच्या नजरा अभिषेक शर्मावर होत्या. पण सरावाच्यावेळी सर्व लक्ष वेगवान गोलंदाज मोहम्मद सिराजवर गेलं. याचं कारण ठरला हार्दिक पंड्या. हार्दिकच्या एका जोरदार फटक्याने थेट सिराजचा लक्ष्य केलं. त्याला दुखापत झाली.
सुपर-8 राऊंडचा पहिला सामना खेळण्याआधी 20 फेब्रुवारीला टीम इंडियाने अहमदाबादच्या नरेंद्र मोदी स्टेडियमवर संध्याकाळी सराव केला. टीम इंडियाचे फलंदाज नेट प्रॅक्टिस करत होते. त्याचवेळी हार्दिक पंड्याने एक जोरदार फटका मारला. शॉट इतका जोरात मारला की, चेंडू थेट सिराजच्या गुडघ्यावर जाऊन लागला. चेंडू लागल्यानंतर सिराज अक्षरक्ष: विव्हळला. मैदानातच बसला. हे पाहताच हार्दिकसह अन्य खेळाडू लगेच धावत तिथे गेले.
काहीवेळ त्याची तपासणी केली
सिराजला होणारा त्रास पाहून टीम इंडियाचा मेडिकल स्टाफ लगेच तिथे पोहोचला. त्यांनी तपासणी सुरु केली. फिजियोने सिराजच्या गुडघ्यावर बर्फ लावला. काहीवेळ त्याची तपासणी केली. दिलासा देणारी बाब ही आहे की, सिराजला झालेली दुखापत गंभीर नाहीय. तो स्वत:च उठून उभा राहिला. आपल्याच प्रॅक्टिस सेशनमध्ये स्वत:चाच खेळाडू जखमी होण्याची ही पहिली वेळ नाहीय. काही दिवसांपूर्वी जसप्रीत बुमराहच्या वेगवान चेंडूवर ईशान किशनच्या पायाला दुखापत झालेली. त्यावेळी सुद्धा सुदैवाने दुखापत गंभीर नव्हती.
टीम इंडियासाठी जास्त टेन्शनचा विषय नाहीय
मोहम्मद सिराजच्या दुखापतीबद्दल बोलायचं झाल्यास काही वेळाने भारताचा वेगवान गोलंदाज पुन्हा प्रॅक्टिस सेशनमध्ये आला. काहीवेळ तो त्रासलेला होता. सिराजची दुखापत टीम इंडियासाठी जास्त टेन्शनचा विषय नाहीय. कारण सिराज प्लेइंग-11 साठी पहिली पसंत नाहीय. दक्षिण आफ्रिकेविरुद्ध टीम इंडिया जसप्रीत बुमराह आणि अर्शदीप सिंह या दोन वेगवान गोलंदाजांच्या प्लेइंग-11 सहच उतरेल. यात अर्शदीपच्या जागी कुठल्या स्पिनरला संधी मिळाल्यास फार आश्चर्य वाटणार नाही.
