कुस्ती महासंघ बनला आखाडा, बृजभूषण सिंहवर आरोप करणारे अनेक जण पदकविजेता

नवी दिल्ली : भारतीय कुस्ती महासंघाचे अध्यक्ष आणि भाजप खासदार बृजभूषण सिंह (Brijbhushan Singh) यांच्यावर देशातील स्टार महिला पैलवानांनी लैंगिक शोषणाचे गंभीर आरोप केले आहेत. टोकिओ ऑलम्पिक स्पर्धेत कांस्य पदक विजेता बजरंग पुनिया (Bajrang Punia) आणि वर्ल्ड चॅम्पियनशिप पदक विजेत्या महिला पैलवान विनेश फोगाट (Vinesh Phogat) यांच्यासह अनेक पैलवानांनी बृजभूषण सिंह यांच्यावर लैगिंक शोषणाचे गंभीर आरोप केले आहेत. या आरोपानंतर क्रीडा मंत्रालयाने कुस्ती महासंघाला उत्तर मागवले आहे.

विशेष म्हणजे बृजभूषण सिंह यांच्याविरोधात या खेळाडूंचं दिल्लीच्या जंतर-मंतर येथे आंदोलन सुरु आहे. त्यांनी केलेले आरोप गंभीर असल्याने एकच खळबळ उडाली आहे. दुसरीकडे महिला पैलवानांचे आरोप सिद्ध झाले तर गळफास घेईन, असं आव्हान बृजभूषण सिंह यांनी दिलं आहे.

कोणी कोणी केले आरोप : बजरंग पूनिया, विनेश फोगाट, आसू मलिक, साक्षी मलिक, सत्यव्रत कादियान, अंतिम पंघाल, रवि दहिया, दीपक पूनिया, संगीता फोगाट, सरिता मोर, सोनम मलिक, महावीर फोगाट, कुलदीप मलिक यांच्यांसह जवळपास ३० पैलवान धरणे आंदोलन करत आहेत. कोणत्या प्रमुख खेळाडूंनी आरोप केले आहेत त्यांची कारकिर्द

बजरंग पूनिया :टोकियो ऑलम्पिक स्पर्धेत रजत पदक विजेता खेळाडू. राष्ट्रकुल क्रीडा स्पर्धेत सुवर्णपदक जिंकले आहे. जागतिक कुस्ती स्पर्धेत चार पदक मिळवले आहे. साक्षी मलिक : रियो ऑलंपिक पदक विजेता खेळाडू आहे. २०१४ मध्ये झालेल्या राष्ट्रकुल स्पर्धेत रौप्य पदक पटकवले होते. आशिया कुस्ती स्पर्धेत कास्य पदक जिंकला आहे. विनेश फोगाट : आशिया व जागतिक कुस्ती स्पर्धेत विजेता खेळाडू. हरियाणातील भिवानी जिल्ह्यातील विनेश रहिवाशी आहे. आशिया स्पर्धेत सुवर्णपदक घेणारी विनेश पहिला भारतीय महिला आहे. सरिता मोर : जागतिक कुस्ती स्पर्धेत विजेता सुमित मलिक : राष्ट्रकुल स्पर्धेत पदक विजेता

क्रीडा मंत्रालयाकडून दखल :  क्रीडा मंत्रालयाने या प्रकरणाची गंभीरता लक्षात घेऊन कुस्ती महासंघाला ७२ तासांत उत्तर देण्याचे आदेश दिले आहे. क्रीडा मंत्रालयाने १८ जानेवारीपासून लखनऊमध्हे होणारा महिला पैलवानांचा राष्ट्रीय कुस्ती शिबीर रद्द केला आहे. या शिबिरात ४१ महिला कुस्तीपटू, १३ कोच व सपोर्ट स्टाफ सहभागी होणार होता.दिल्ली महिला आयोगाने या प्रकरणी सुमोटो घेत पावले उचलली आहे.