AFG vs CAN : Ibrahim Zadran ची ऐतिहासिक खेळी, कॅनडा विरुद्ध अफगाणिस्तानचं द्विशतक

आयसीसी टी 20 वर्ल्ड कप 2026 स्पर्धेतील 39 व्या सामन्यात अफगाणिस्तान विरुद्ध कॅनडा आमनेसामने आहेत. दोन्ही संघांचा हा साखळी फेरीतील चौथा आणि शेवटचा सामना आहे. उभयसंघातील सामन्याचं आयोजन हे चेन्नईतील एमए चिदंबरम स्टेडियममध्ये करण्यात आलं आहे. दोन्ही संघांचं या स्पर्धेतील आव्हान साखळी फेरीतच संपुष्टात आलं आहे. त्यामुळे दोन्ही संघांचा विजय मिळवून मोहिमेचा शेवट गोड करण्याचा प्रयत्न असणार आहे. अफगाणिस्तानने या सामन्यात ऐतिहासिक कामगिरी केली आहे. तसेच अफगाणिस्तानचा सलामीवीर फलंदाज इब्राहीम झद्रान याने महारेकॉर्ड केलाय. अफगाणिस्तान टीम आणि इब्राहीम झद्रान या दोघांनी काय केलंय हे सविस्तर जाणून घेऊयात.

अफगाणिस्तानची टी 20i वर्ल्ड कपमधील सर्वोच्च धावसंख्या

इब्राहीम अफगाणिस्तानसाठी टी 20i वर्ल्ड कप स्पर्धेच्या इतिहासात एका डावात सर्वात मोठी खेळी करणारा पहिला फलंदाज ठरला आहे. इब्राहीमने याबाबत रहमानुल्लाह गुरुबाज याचा विक्रम मोडीत काढला आहे. तसेच अफगाणिस्तानची टी 20i वर्ल्ड कप स्पर्धेत 200 धावा करण्याची ही पहिलीच वेळ ठरली आहे. अफगाणस्तानची याआधी टी 20i वर्ल्ड कप स्पर्धेत 190 ही सर्वोच्च धावसंख्या होती. अफगाणिस्तानने 2021 च्या टी 20i वर्ल्ड कप मध्ये स्कॉटलंड विरुद्ध 4 विकेट्स गमावून 190 धावा केल्या होत्या.

रहमानुल्लाह गुरुबाज रेकॉर्ड ब्रेक

इब्राहीमने केलेल्या नाबाद 95 धावांच्या जोरावर अफगाणिस्तानने 20 ओव्हरमध्ये 4 विकेट्स गमावून 200 धावा केल्या. इब्राहीमने 56 बॉलमध्ये 95 धावा केल्या. इब्राहीमने 85 धावा करताना इतिहास घडवला. इब्राहीमने रहमानुल्लाह गुरुबाज याला मागे टाकत अफगाणिस्तानसाठी टी 20i वर्ल्ड कपमध्ये सर्वात मोठी खेळी करणारा फलंदाज हा बहुमान मिळवला. रहमानुल्लाहने याच वर्ल्ड कपमध्ये दक्षिण आफ्रिकेविरुद्ध 84 धावांची खेळी केली. उभयसंघातील हा सामना बरोबरीत सुटला होता. त्यांनतर दुसऱ्या सुपर ओव्हरमध्ये विजेता ठरला. दक्षिण आफ्रिकेने अफगाणिस्तानवर मात केली होती.

अफगाणिस्तानचं साखळी फेरीत पॅकअप

दरम्यान अफगाणिस्तान क्रिकेट टीमने गेल्या टी 20i वर्ल्ड कप स्पर्धेत उपांत्य फेरीपर्यंत धडक दिली होती. मात्र अफगाणिस्तानचं यंदा दुर्देव असं की त्यांचा साखळी फेरीतच बाजार उठला. अफगाणिस्तानने आतापर्यंत साखळी फेरीत 3 फेरीत एकमेव सामना जिंकला आहे. त्यामुळे अफगाणिस्तान वर्ल्ड कप स्पर्धेत आपल्या मोहिमेचा शेवटचा विजयाने करण्यात यशस्वी ठरणार का हे निकालानंतरच स्पष्ट होईल.