AUS vs OMAN : कांगारुंकडून मोहिमेचा शेवट विजयाने, ओमान विरुद्ध 9 विकेट्सने जिंकला सामना
Australia vs Oman, Match Result : ऑस्ट्रेलियाचं या सामन्याआधीच साखळी फेरीतून पॅकअप झालं होतं. त्यामुळे कांगारुंसाठी ओमान विरुद्धचा सामना हा प्रतिष्ठेचा होता. कांगारुंनी या सामन्यात दुबळ्या ओमानवर विजय मिळवला.
आयसीसी टी 20i वर्ल्ड कप 2026 स्पर्धेत साखळी फेरीतील 40 व्या आणि शेवटच्या सामन्यात बी ग्रुपमधील ऑस्ट्रेलिया विरुद्ध ओमान संघ आमनेसामने होते. ऑस्ट्रेलियाने मिचेल मार्श याच्या नेतृत्वात साखळी फेरीतील शेवटचा सामना जिंकून आपल्या मोहिमेचा शेवट गोड केला. ऑस्ट्रेलियाचं साखळी फेरीतच आव्हान संपुष्टात आलं होतं. त्यामुळे ऑस्ट्रेलिया ओमान विरुद्ध जिंकण्यात यशस्वी ठरणार का? याकडे क्रिकेट विश्वाचं लक्ष लागून होतं. मात्र ऑस्ट्रेलियाने त्यांच्या तुलनेत लिंबूटिंबु असलेल्या ओमानवर मात करत या 10 व्या टी 20i वर्ल्ड कप स्पर्धेतील दुसरा विजय मिळवला. तर ओमान विजयाचं खातं उघडण्यात अपयशी ठरली. ओमानचा हा सलग आणि एकूण चौथा पराभव ठरला.
एडम झॅम्पा याने घेतलेल्या 4 विकेट्स आणि त्यानंतर कॅप्टन मिचेल मार्श याने केलेली नाबाद अर्धशतकी खेळी या जोरावर ऑस्ट्रेलियाने ओमान विरुद्ध एकतर्फी विजय मिळवला. ऑस्ट्रेलियाने 9 विकेट्सने ओमानला पराभवाची धुळ चारली. या सामन्याचं आयोजन हे पल्लेकेले आंतरराष्ट्रीय स्टेडियममध्ये करण्यात आलं होतं.
सामन्यात काय झालं?
ऑस्ट्रेलियाने टॉस जिंकून ओमानला बॅटिंगसाठी भाग पाडलं. कॅप्टन मिचेल मार्श याचा निर्णय गोलंदाजांनी योग्य ठरवला. ऑस्ट्रेलियाने ओमानला 22 बॉलआधी ऑलआऊट केलं. ओमानने 16.2 ओव्हरमध्ये ऑलआऊट 104 धावा केल्या. त्यानंतर ऑस्ट्रेलियाने 62 बॉलआधी विजयी धावा पूर्ण केल्या. ऑस्ट्रेलियाने 9.4 ओव्हरमध्ये 1 विकेट गमावून 108 धावा केल्या.
कॅप्टन मार्शची विजयी खेळी
मिचेल मार्शन याने ऑस्ट्रेलियासाठी सर्वाधिक धावा केल्या. मार्शने 33 बॉलमध्ये नॉट आऊट 64 रन्स केल्या. हेडने 19 बॉलमध्ये 32 धावांचं योगदान दिलं. तर जोश इंग्लिस 12 धावा करुन नाबाद परतला. त्याआधी ओमानसाठी वसीम अली याने सर्वाधिक32 धावा केल्या. तर इतरांनी ऑस्ट्रेलियाच्या गोलंदाजांसमोर गुडघे टेकले. एडम झॅम्पा याने 3.2 ओव्हरमध्ये 21 धावा देत ओमानच्या 4 फलंदाजांना मैदानाबाहेरचा रस्ता दाखवला. ग्लेन मॅक्सवेल आणि झेव्हीयर बार्टलेट या दोघांनी 2 विकेट्स घेतल्या. तर मार्कस स्टोयनिस आणि नॅथन एलिस या दोघांनी प्रत्येकी 1-1 विकेट मिळवली.
ऑस्ट्रेलियाची निराशाजनक कामगिरी
दरम्यान ऑस्ट्रेलियाला टी 20i वर्ल्ड कप स्पर्धेच्या 10 व्या पर्वात लौकीकाला साजेशी कामगिरी करता आली नाही. ऑस्ट्रेलिया टीमने साखळी फेरीत 4 पैकी 2 सामने जिंकले तर तितकेच सामने गमावले. ऑस्ट्रेलियाला झिंबाब्वे आणि श्रीलंकेकडून पराभूत व्हावं लागलं. तर ऑस्ट्रेलियाने ओमानआधी आयर्लंडवर विजय मिळवला.
