BAN vs PAK : ज्यांच्यासाठी Iccसोबत पंगा, त्यांनीच गेम केला, बांगलादेशकडून पाकिस्तानचा धुव्वा
Bangladesh vs Pakistan 1st Odi Match Result : टी 20i वर्ल्ड कप 2026 स्पर्धेतून बाहेर झाल्यानंतर पाकिस्तानला बांगलादेशकडून लाजीरवाण्या पराभवाचा सामना करावा लागला आहे.
बांगलादेशमधील वाढत्या तणावानंतर केकेआरने बीसीसीआयच्या आदेशानुसार मिस्तफिजुर रहमान याची टीममधून हकालपट्टी केली. त्यानंतर अचानक बांगलादेश क्रिकेट बोर्डाने सुरक्षेचं कारण पुढे करत भारतात होणाऱ्या टी 20i वर्ल्ड कप स्पर्धेतील सामने श्रीलंकेत खेळवण्यात यावे, अशी मागणी केली. मात्र आयसीसीने मागणी फेटाळल्यानंतर बांगलादेशने या स्पर्धेवर बहिष्कार टाकला. त्यानंतर पाकिस्तान बांगलादेशसाठी आयसीसी विरुद्ध मैदानात उतरली होती. मीडिया रिपोर्ट्सनुसार, बांगलादेशला स्पर्धेत सहभागी करावं या मागणीसाठी पाकिस्तानने टीम इंडिया विरुद्ध 15 फेब्रुवारीला होणाऱ्या सामन्यात खेळणार नसल्याची भूमिका घेतली होती. मात्र त्याच काही फायदा झाला नाही. पाकिस्तानला शेवटची टीम इंडिया विरुद्ध खेळावं लागलं.
बांगलागदेशकडून पाकिस्तानचा गेम
आता पाकिस्तानने ज्यांच्यासाठी इतका उपदव्याप केला त्या बांगलादेशनेच त्यांचा मोठा गेम केला आहे. टी 20i वर्ल्ड कप 2026 स्पर्धेतील सुपर 8 मधून बाहेर झाल्यानंतर पाकिस्तानची 3 सामन्यांच्या एकदिवसीय मालिकेत पराभवाने सुरुवात झाली. बांगलादेशने पाकिस्तानचा एकदिवसीय मालिकेतील पहिल्याच सामन्यात टी 20i स्टाईलने धुव्वा उडवला आहे.
बांगलादेशचा दणदणीत विजय
पाकिस्तान सध्या बांगलादेश दौऱ्यावर आहे. उभयसंघातील पहिला एकदिवसीय सामना हा 11 मार्चला ढाक्यातील शेरे बांगला नॅशनल स्टेडियममध्ये खेळवण्यात आला. बांगलादेशने या सामन्यात पाकिस्तानचं 114 रन्सवर पॅकअप केलं. त्यानंतर बांगलादेशने विजयी आव्हान 91 बॉलमध्ये पूर्ण करत पाकिस्तानचं पॅकअप केलं. बांगलादेशने या विजयासह 3 सामन्यांच्या मालिकेत 1-0 अशा फरकाने आघाडी घेतली.
सामन्यात काय झालं?
बांगलादेशने टॉस जिंकून पाकिस्तानला बॅटिंगसाठी भाग पाडलं. पाकिस्तानसाठी फहीम अश्रफ याने सर्वाधिक 37 धावा केल्या. त्यामुळे पाकिस्तानला 100 पार मजल मारता आली. तर इतर फलंदाजांचा नाहिद राणा आणि कॅप्टन मेहदी हसन मिराज या दोघांचा कार्यक्रम केला. नाहिदने 5 विकेट्स मिळवल्या. तर मेहदीने तिघांना मैदानाबाहेरचा रस्ता दाखवला. तर इतरांनीही चांगली साथ दिली. अशाप्रकारे बांगलादेशने पाकिस्तानला 30.4 ओव्हरमध्ये 114 रन्सवर ऑलआऊट केलं.
बांगलादेशची विजयी सलामी
त्यानंतर बांगलादेशने तांझिद हसन तमिम याने केलेल्या नाबाद 67 धावांच्या जोरावर सहज विजय मिळवला. बांगलादेशने 15.1 ओव्हरमध्ये 2 विकेट्स गमावून विजयी धावा पूर्ण केल्या. बांगलादेशसाठी तांझिद व्यतिरिक्त नजमुल शांतो याने 27 धावांचं योगदान दिलं.आता उभयसंघातील दुसरा आणि निर्णायक क्रिकेट सामना हा शुक्रवारी 13 मार्च रोजी होणार आहे.
