Salman Agha : हे पाकिस्तानच करु शकतं, सलमान आघा असा रन आऊट झाला, पाहा व्हीडिओ
Salman Agha Run Out Controversy Video : पाकिस्तानने क्रिकेट विश्वाला रन आऊट होण्याची नवीन पद्धत दाखवून दिली आहे. व्हीडिओत पाहा पाकिस्तानचा फलंदाज सलमान आघा बांगलादेश विरुद्धच्या दुसऱ्या एकदिवसीय सामन्यादरम्यान कसा रन आऊट झाला ते.
पाकिस्तान क्रिकेट टीम आयसीसी टी 20i वर्ल्ड कप 2026 स्पर्धेनंतर एकदिवसीय मालिकेसाठी बांगलादेश दौऱ्यावर आहे. बांगलादेश विरुद्ध पाकिस्तान यांच्यात एकूण 3 सामन्यांची एकदिवसीय मालिका खेळवण्यात येत आहे. बांगलादेशने मायदेशातील या मालिकेतील पहिल्या सामन्यात जबरदस्त असा विजय मिळवत 1-0 ने आघाडी मिळवली. त्यानंतर क्रिकेट विश्वाने उभयसंघातील दुसऱ्या एकदिवसीय सामन्यात पाकिस्तान क्रिकेटची लाज जाताना पाहिली. उभयसंघातील दुसऱ्या सामन्यात सलमान आघा विचित्र पद्धतीने रन आऊट झाला. आघा रन आऊट झाल्यानंतर संतापला. आघाने मैदानात हेल्मेट आपटला. तसेच पंचांसह हुज्जत घातली. त्यामुळे सलमान आघावर कारवाई होण्याची शक्यता नाकारता येत नाही. सलमानने नक्की काय केलं हे जाणून घेऊयात.
नक्की काय झालं?
सलमान पाकिस्तानच्या डावातील 39 व्या ओव्हरमध्ये रन आऊट झाला. बांगलादेशकडून मेहदी हसन ओव्हर टाकत होता. तर सलमानसोबत मोहम्मद रिझवान खेळत होता. हसनने या ओव्हरमधील टाकलेला चौथा बॉल रिझवान हलूच खेळला. त्यानंतर नॉन स्ट्राइक एंडवर (अंपायरच्या बाजूला) असलेला आघा क्रीझच्या बाहेर आला. रिझवानने हलूच खेळलेला बॉल सलमानच्या दिशेने आला. कहर म्हणजे सलमानने क्रीझ बाहेरुनच बॉल थांबवला. सलमानने क्रीझ बाहेर असतानाही बॉल उचलून देण्याचा प्रयत्न केला. इथेच सलमानचा गेम झाला. मेहदी हसन याने झटकन बॉल उचलला आणि क्षणाचा विलंब न करतान सलमानला रन आऊट केलं.
सलमानची सटकली, भर मैदानात हेल्मेट फेकला
मेहदीने रन आऊट केल्यानंतर सलमान हुज्जत घालायला लागला. सलमान आपण आऊट नसल्याच्या भ्रमात होता. मात्र थर्ड अंपायरनेही सलमान आऊट असल्याचंच जाहीर केलं. सलमानला हा निर्णय काय पटला नाही. त्यामुळे सलमान संतापला. सलामाने रागाच्या भरात हेल्मेट आणि त्यानंतर ग्लोव्हज फेकले.
आता सलमानवर कारवाई फिक्स!
gotta feel for Salman Ali Agha, nothing new for Bangladeshis from timing out batsmen to this.pic.twitter.com/gK3rHCN6rC
— PCT Replays 2.0 (@ReplaysPCT) March 13, 2026
आता सलमानला पंचांवर संतापणं तसेच हेल्मेट-ग्लोव्हज फेकणं चांगलंच महागात पडणार असल्याचं म्हटलं जात आहे. आयसीसीच्या आचार संहितेनुसार, लेव्हल 1 आणि 2 नुसार सलमानवर कारवाई होऊ शकते. आयसीसी आचार संहितेच्या लेव्हल 1-2 मध्ये पंचांशी वाद घालणे आणि क्रिकेट साहित्य फेकणाऱ्या विरोधात कारवाईची तरतूद आहे. त्यामुळे सामनाधिकारी याबाबत काय निर्णय घेतात हे पाहणं महत्त्वाचं ठरणार आहे.
सलमानच्या बांगलादेश विरुद्ध किती धावा?
सलमानने केलेल्या मुर्खपणामुळे त्याच्या खेळीचा शेवट झाला. सलमानने दुसऱ्या एकदिवसीय सामन्यात 62 बॉलमध्ये 64 रन्सची खेळी केली. सलमानने या दरम्यान 7 चौकार आणि 2 षटकार लगावले.
