मुंबई: भारतीय क्रिकेट बोर्डासोबतनाव जोडण्यासाठी मोठ मोठ्या कंपन्या आणि मोठ मोठे ब्रँडस सतत प्रयत्न करत असतात. फक्त काही कंपन्यांना यात यश मिळतं. मोठी रक्कम खर्च करुन, या कंपन्या BCCI शी स्पॉन्सरशिप डील करतात. मागच्या काही वर्षात ही स्पर्धा तीव्र झाली आहे. यातून बीसीसीआयला भरपूर उत्पन्न मिळतं. प्रायोजकत्व (Sponsership) मिळवण्यासाठी जशी स्पर्धा असते, तसंच मागच्या काही वर्षात काही कंपन्यांनी डील सुद्धा तोडली आहे. यात पेटीएमच एक नवीन नाव जोडलं गेलं आहे.
BCCI ची टायटल स्पॉन्सर कंपनी पेटीएमने बोर्डासोबतच करार मध्येच संपवण्याचा निर्णय घेतला आहे. या संदर्भात कंपनीने बोर्डासमोर आपली इच्छा व्यक्त केली. बीसीसीआयने त्यांची विनंती मान्य केली आहे. एका रिपोर्टनुसार, 2023 पर्यंत चालणारा हा करार पुढच्या काही दिवसात संपवला जाऊ शकतो. पेटीएम स्पॉन्सरशिपचा अधिकार जगातील प्रमुख फायनान्स कंपनी मास्टरकार्डला ट्रान्सफर करण्याच्या तयारीत आहे.
भारतात होणाऱ्या मालिकेत टायटल स्पॉन्सर म्हणून पेटीएमच्या जागी मास्टरकार्डचं नाव दिसणार आहे, अंस वृत्त इनसाइट स्पोर्टने दिलं आहे. सप्टेंबर महिन्यात ऑस्ट्रेलियाचा संघ भारत दौऱ्यावर येणार आहे. त्यावेळी टी 20 सीरीजपासून टायटल स्पॉन्सरशिप मधला बदल दिसेल. आंतरराष्ट्रीय मालिकाच नाही, मास्टरकार्ड देशांतर्गत स्पर्धा खासकरुन रणजी ट्रॉफीच्यावेळी सुद्धा टायटन्स स्पॉन्सर असेल.
टायटल स्पॉन्सरशिप ट्रान्सफर होणार असली, तरी किंमतीमध्ये काही बदल होणार नाही. मास्टरकार्ड प्रत्येक सामन्यासाठी 3.8 कोटी रुपये खर्च करेल. पेटीएमने याच किंमतीला 2019 साली डील साइन केली होती. बोर्डाला काही प्रमाणात अतिरिक्त रक्कम मिळू शकते. नियमांनुसार, स्पॉन्सरशिप ट्रान्सफरच्या विषयात पहिल्या कंपनीला ट्रान्सफर फीस म्हणून 5 टक्के रक्कम बोर्डाला द्यावी लागते.