ENG vs IND Odi Series : विराट कोहलीची इंग्लंडमधील कामगिरी कशी? जाणून घ्या
England vs India Odi Series 2026 : विराट कोहली याला दुखापतीमुळे अफगाणिस्तान विरूद्धच्या एकदिवसीय मालिकेत खेळता आलं नाही. मात्र आता विराट इंग्लंड विरूद्धच्या एकदिवसीय मालिकेआधी फिट झाला आहे. त्यामुळे विराट इंग्लंड विरुद्ध खेळणार असल्याचं निश्चित झालं आहे.
बीसीसीआय निवड समितीने रविवारी 21 जून रोजी इंग्लंड विरूद्धच्या एकदिवसीय मालिकेसाठी टीम इंडियाचा 15 सदस्यीय संघ जाहीर केला. इंग्लंड विरुद्धच्या या मालिकेतून एकदिवसीय संघात अनुभवी फलंदाज आणि माजी कर्णधार विराट कोहली याचं कमबॅक झालं. टीम इंडिया इंग्लंड दौऱ्यात 5 सामन्यांची टी 20i मालिका खेळणार आहे. श्रेयस अय्यर या मालिकेत नेतृत्व करणार आहे. श्रेयसची कर्णधार म्हणून ही दुसरीच मालिका असणार आहे. तर टीम इंडियाची इंग्लंड दौऱ्याची सांगता ही एकदिवसीय मालिकेने होणार आहे. या मालिकेत एकूण 3 सामने खेळवण्यात येणार आहेत. या मालिकेनिमित्ताने भारताचा अनुभवी फलंदाज विराट कोहली याची इंग्लंडमध्ये कशी कामगिरी राहिली आहे हे आपण जाणून घेणार आहोत.
विराटचे इंग्लंडमधील आकडे
विराट कोहली याने आतापर्यंत भारताला एकदिवसीय क्रिकेट कारकीर्दीत अनेकदा एकहाती विजय मिळवून दिला आहे. विराट आतापर्यंत इंग्लंडमध्ये एकूण 33 सामने खेळला आहे. विराटने या 33 सामन्यांत 50 पेक्षा अधिकच्या सरासरीने धावा केल्या आहेत. विराटने 51.88 च्या सरासरीने एकूण 1 हजार 349 धावा केल्या आहेत. विराटने इंग्लंडमध्ये 1 शतक आणि 12 अर्धशतकं झळकावली आहेत. तसेच विराट इंग्लंडमध्ये 2 वेळा अपयशी ठरला आहे. विराट 2 वेळा भोपळा न फोडता माघारी परतला आहे.
विराटला रोखणं अवघड
विराट गेल्या काही सामन्यांपासून एकदिवसीय क्रिकेटमध्ये सातत्याने खोऱ्याने धावा करत आहे. त्यामुळे विराटला रोखणं इंग्लंडसाठी आव्हानात्मक ठरणार आहे. विराटने गेल्या 7 एकदिवसीय सामन्यांत 3 शतकं आणि 3 अर्धशतकं झळकावली आहेत. तसेच विराटने 2026 वर्षात 80 च्या सरासरीने 240 धावा केल्या आहेत. तर विराटने 2025 मध्ये 65.1 च्या सरासरीने 651 धावा केल्या होत्या. त्यामुळे विराटला झटपट रोखण्याचं आव्हान इंग्लंडच्या गोलंदाजांसमोर असणार आहे. मात्र त्यात त्यांना कितपत यश येतं हे पाहणं महत्त्वाचं ठरणार आहे.
इंग्लंड-इंडिया वनडे मालिकेचं वेळापत्रक
पहिला सामना, 14 जुलै, बर्मिंगघम
दुसरा सामना, 16 जुलै, कार्डीफ
तिसरा आणि अंतिम सामना, 19 जुलै, लंडन
टीम इंडियाची इंग्लंडमधील कामगिरी
दरम्यान इंग्लंडमध्ये टीम इंडिया विरुद्ध इंग्लंड यांच्यात एकूण 77 एकदिवसीय सामने खेळवण्यात आले आहेत. इंग्लंडने या 77 पैकी सर्वाधिक सामन्यांत विजय मिळवला आहे. इंग्लंडने भारताला 43 सामन्यांमध्ये पराभूत केलं आहे. तर भारताने या 77 पैकी 22 सामने जिंकले आहेत. तसेच इंग्लंड विरुद्ध भारत यांच्यातील 10 सामन्यांचा निकाल लागला नाही. तर 2 सामने बरोबरीत सुटले.
