पाकिस्तान संघ आहे की नाटक कंपनी..! इमाम उल हकचा ड्रामा पाहून स्टूअर्ट ब्रॉडचा संताप, म्हणाला..
पाकिस्तानचा संघ इंग्लंड दौऱ्यावर असून तीन सामन्यांची कसोटी मालिका खेळत आहे. या कसोटी मालिकेतील दुसऱ्या सामन्यात पाकिस्तानचा ड्रामा पाहायला मिळाला. खरं तर ही मालिका पाकिस्तानने गमावली आहे. पण इमाम उल हकचा ड्रामा चर्चेत आला आहे.
इंग्लंड आणि पाकिस्तान यांच्यातील दुसरा कसोटी सामना लॉर्ड्सवर पार पडला. या सामन्यात इंग्लंडने पाकिस्तानला 194 धावांनी धोबीपछाड दिला. या सामन्याच्या दोन्ही डावात इमाम उल हक फलंदाजीला उतरला नाही. दुखापतीचं कारण सांगून त्याने दोन्ही डावात फलंदाजी केली नाही. पण हा बनाव असल्याचं काही लपून राहीलं नाही. एखाद्या चित्रपटातीला भूमिकेला लाजवेल इतका ड्रामा त्याने क्रिकेटच्या मैदानात केला. खरं तर एखाद्या खेळाडूचं प्लेइंग 11 मध्ये खेळण्याचं स्वप्न असतं. पण प्लेइंग 11 मध्ये संधी मिळूनही दोन्ही डावात फलंदाजीला न उतरणं हे आश्चर्यचकीत करणारं आहे. त्यात त्याला झालेली दुखापतही किरकोळ असल्याचं दिसून आलं आहे. त्यामुळे इमाम उल हक आजी माजी क्रिकेटपटूंच्या रडारवर आला आहे. इंग्लंडचा माजी वेगवान गोलंदाज स्टूअर्ट ब्रॉडने इमामच्या दुखापतीवरून टीकास्त्र सोडलं आहे. इमाम कॅमेरा आणि प्रेक्षकांसमोर नाटकं करत होता, असा आरोप त्याने केला.
झेल सोडल्यानतंर लगेचच दुखापत..
इमाम उल हकने कसोटी सामन्याच्या पहिल्याच दिवशी गचाळ क्षेत्ररक्षण केलं आणि दोन महत्त्वाचे झेल सोडले. त्यामुळे पाकिस्तानी क्रीडाप्रेमींनी राग व्यक्त केला होता. असं असताना त्याने डाव्या पोटरीला दुखापत झाल्याचा बनाव रचला आणि मैदानाबाहेर गेला. त्यानंतर वैद्यकीय टीमने तपासणी केली आणि कसोटी संपूर्ण सामन्यातून बाद झाल्याचं घोषित केलं. त्यामुळे त्याच्या गैरहजेरीत पाकिस्तान एक खेळाडू शॉर्ट ठेवून फलंदाजी करावी लागली. त्याच्या गैरहजेरीत संघाचं नुकसान झालं. आघाडीचा फलंदाज खेळत नसल्याचं संघाचं संतुलन बिघडलं ते वेगळं.. त्याचा थेट परिणाम फलंदाजीच्या क्रमवारीवर झाला.
खरं तर वैद्यकीय टीमने तपासणी केल्यानंतर तो खेळणार नसल्याचं जाहीर केलं होतं. पण चौथ्या दिवशी इमाम उल हक लॉर्ड्सवर डाव्या पोटरीला पट्टी बांधून लंगडत फलंदाजी सराव करताना दिसला. त्यानंतर खऱ्या अर्थाने वाद सुरू झाला. दुसऱ्या डावात संघाला गरज भासली तर तो फलंदाजीला उतरेल असं सांगितलं गेलं. पण त्याची एक्टिंग पाहून स्टूअर्ट ब्रॉड संतापला. ब्रॉड म्हणाला की, ‘हे फक्त दाखवण्यासाठी करत आहे. मीडिया आणि त्याच्यावर सहकाऱ्यांकडून होत असलेली टीका पाहून त्याने हा बनाव रचल्याचं दिसत आहे. जर त्याला सरावच करायचा होता, तर इनडोअर सराव करू शकला असता. सर्वांसमोर हाफ पॅँट घालून पायाला टेप लावून आणि लंगडण्याचं नाटक करण्याची गरज नव्हती. ‘
