Shubman Gill : वडिलांचे ते शब्द आणि शुबमन गिल याने ठोकलं द्विशतक
टीम इंडियाचा युवा फलंदाज शुबमन गिल याने बुधवारी 18 जानेवारीला न्यूझीलंड विरुद्धच्या पहिल्या एकदिवसीय सामन्यात शानदार द्विशतक ठोकलं. शुबमनने 208 धावांची खेळी केली.
मुंबई : क्रिकेट विश्वात गेल्या काही तासांपासून टीम इंडियाचा युवा फलंदाज शुबमन गिल याची हवा आहे. शुबमनने न्यूझीलंड विरुद्धच्या पहिल्या एकदिवसीय सामन्यात धमाकेदार खेळी करत द्विशतक ठोकण्याचा कारनामा केला. शुबमन यासह अशी कामगिरी करणारा पाचवा भारतीय फलंदाज ठरला. तसेच सर्वात कमी वयात द्विशतक करणारा फलंदाजही ठरला. लेकाने केलेल्या कारनाम्यामुळे वडिलांचीही चर्चा होऊ लागली.
शुबमनने श्रीलंका विरुद्धच्या तिसऱ्या एकदिवसीय सामन्यात शतक ठोकलं. होतं. श्रीलंका विरुद्ध 15 जानेवारीला झालेल्या या सामन्यात शुबमनने 116 धावांची खेळी केली होती. गिलचं मायदेशातील हे पहिलंवहिलं शतक होतं. मात्र यानंतरही गिलचे वडील लखविंदर सिंह हे आनंदी नव्हते. इंडियन एक्सप्रेससोबत बोलताना पंजाबचे क्रिकेटर गुरकीरत मान यांनी याबाबतचा खुलासा केलां.
गिलचे वडील काय म्हणाले?
“तुम्हीच पहा तो कसा आऊट झाला. शुबमनने शतक पूर्ण केलं. मात्र त्याला द्विशतक पूर्ण करण्याची संधी होती. द्विशतकासाठी आवश्यक तितका वेळ त्याच्याकडे होता. त्याला कायम अशी सुरुवात मिळणार नाही. तो केव्हा शिकणार”, असं लखविंदर म्हणाले असल्याचं गुरकीरत यांनी मुलाखतीदरम्यान सांगितलं.
वडिलांनी नाराजी व्यक्त केल्यानंतरच्या अवघ्या 72 तासातच शुबमनने 18 जानेवारीला 208 धावांची धमाकेदार खेळी केली.
“शुबमनकडून त्याच्या वडिलांना फार आशा होत्या. आता लेकाच्या द्विशतकानंतर ते आनंदी असतील अशी आशा आहे. गिलचा आत्मविश्वास कधी कमी झाला नाही. गिल कायम 40-50 धावा करायचा. मात्र त्याला त्या खेळीचं शतकात बदलता यायचं नाही. विषय कामगिरीचा नव्हता. फलंदाजाची कामगिरी तेव्हा ढासळते जेव्हा त्याला दुहेरी आकडाही गाठता येत नाही. शुबमनने पहिलं एकदिवसीय शतक झिंबाब्वे विरुद्ध केलं. शुबमनने ते शतक वडिलांना समर्पित केलं. माझे वडीलच माझे कोच आहेत, असं गिल म्हणाला होता”, असंही गुरकीरत यांनी नमूद केलं.
दरम्यान टीम इंडियाने पहिल्या सामन्यात 12 धावांनी विजय मिळवला. या विजयासह टीम इंडियाने 3 सामन्यांच्या मालिकेत 1-0 ने आघाडी घेतली दरम्यान मालिकेतील दुसरा आणि निर्णायक सामना हा शनिवारी 21 जानेवारीला खेळवण्यात येणार आहे.
