IPL 2022 Final: रेहमान यांच्यासोबत लाखभर भारतीयांनी गायलं ‘वंदे मातरम’, अंगावर शहारे आणणारा VIDEO एकदा बघाच

AR Rehman performance

Image Credit source: twitter

मुंबई: गुजरात टायटन्स आणि राजस्थान रॉयल्स (GT vs RR) या दोन संघांमध्ये काल इंडियन प्रिमीयर लीगच्या 15 व्या सीजनचा फायनल सामना झाला. अहमदाबादच्या नरेंद्र मोदी स्टेडियमवर (Narendra modi Stadium) फायनल मॅच आयोजित करण्यात आली होती. नरेंद्र मोदी स्टेडियम हे जगातील एक मोठं स्टेडियम आहे. एकाचवेळी 1.32 लाख क्रिकेट रसिकांना सामावून घेण्याची या स्टेडियमची क्षमता आहे. काल झालेल्या आयपीएल फायनल मॅचच्यावेळी हे स्टेडियम प्रेक्षकांनी खच्चून भरलेलं होतं. आयपीएल फायनल आठ वाजता सुरु झाली. पण त्याआधी 6.30 वाजता क्लोजिंग सेरेमनचा रंगारंग कार्यक्रम झाला. बॉलिवूडचा सुपरस्टार रणवीर सिंह आणि प्रसिद्ध संगीत दिग्दर्शक ए.आर.रेहमान (AR Rehman) यांनी या क्लोजिंग सेरेमनीमध्ये रंग भरले. दोघांनी दमदार परफॉर्मन्सेस सादर केले. ’83’ चित्रपटातील गाण्यावर रणवीर सिंहच्या नृत्याने या कार्यक्रमाची सुरुवात झाली. त्याने बॉलिवूडच्या वेगवेगळ्या गाण्यांवर ठेका धरला व उपस्थितांचे मनोरंजन केलं.

आधी रणवीरचा सुपर परफॉर्मन्स

रणवीर सिंहने परफॉर्मन्स सादर केल्यानंतर एआर रहमान यांनी परफॉर्मन्स सादर केला. रेहमान यांच्यासोबत निती मोहन, मोहित चौहान यांनी सुद्धा सादरीकरण केलं. रेहमान यांनी क्लोजिंग सेरेमनीमध्ये ‘स्लमडॉग मिलेनियर’ या चित्रपटातील गाजलेलं ‘जय हो’ गाणं सादर केलं. त्याचवेळी त्यांनी ‘वंदे मातरम’ हे गाण सुद्धा गायलं. रेहमान जेव्हा कुठल्याही कार्यक्रमात ‘वंदे मातरम’ गाणं सादर करतात, त्यावेळी तो कार्यक्रम एका वेगळया उंचीवर जातो. मनात देशभक्तीची भावना जागृत होते. उर अभिमानाने भरुन येतो.

गीत ऐकून अंगावर शहारे आले

काल नरेंद्र मोदी स्टेडियमवर जेव्हा एआर रेहमान, निती मोहन आणि मोहित चौहान यांनी हे गाणं सादर केलं. त्यावेळी सुद्धा असचं वातावरण होतं. कालचा हा सामना पाहण्यासाठी स्टेडियममध्ये 1 लाखापेक्षा जास्त लोक उपस्थित होते. रेहमान यांच्या सूरात सूर मिसळून स्टेडियममध्ये उपस्थित असलेले प्रेक्षकही ‘वंदे मातरम’ गाणं म्हणत होते. हे सुंदर दृश्य कॅमेऱ्यात कैद झालं असून आयपीएलने हा व्हिडिओ टि्वट केला आहे. रेहमान यांच्यासोबत लाखभर भारतीयांना ‘वंदे मातरम’ गीत गाताना ऐकून अंगावर शहारे येतात.