IPL 2022, Purple cap: युजवेंद्र चहलची चिंता वाढली, मित्रच पर्पल कॅप हिसकावणार ?

आयपीएलच्या पर्पल कॅपमध्ये युझवेंद्र चहल पहिल्या क्रमांकावर

Image Credit source: Rajasthan Royals Twitter

मुंबई: IPL 2022 स्पर्धेचा रोमांच प्रत्येक सामन्यानिशी वाढत चालला आहे. पर्पल (Purple cap) आणि ऑरेंज कॅपसाठीची स्पर्धा अधिक तीव्र होतेय. पहिलं स्थान कोणासाठीही कायमस्वरुपी नाहीय. प्रत्येक मॅच बरोबर दावेदार बदलत चालले आहेत. गुरुवारी आयपीएलमध्ये दिल्ली कॅपिटल्स आणि कोलकाता नाइट रायडर्समध्ये (DC vs KKR) सामना झाला. या सामन्यानंतर युजवेंद्र चहलची चिंता वाढली असेल. त्याच्या पर्पल कॅपला धोका निर्माण झाला आहे. चहलचाच सहकारी कुलदीप यादव त्याच्याजवळ पोहोचला आहे. मागच्या सामन्यातील वाद मागे सोडून दिल्ली कॅपिटल्सने काल केकेआरवर विजय मिळवला. ऋषभ पंतच्या नेतृत्वाखाली खेळणाऱ्या दिल्लीने चार विकेटने विजय मिळवला. या सामन्यात 15 विकेट पडले. ज्या सामन्यात गोलंदाजांचं वर्चस्व पहायला मिळतं, त्या सामन्यात पर्पल कॅपच्या शर्यतीत बदलही दिसणही स्वाभाविक आहे.

कुलदीप यादवची झेप

केकेआरने प्रथम फलंदाजी करताना निर्धारित 20 ओव्हर्समध्ये 146 धावा केल्या. कोलकाताला इतक्या कमी धावसंख्येवर रोखण्यात डावखुरा फिरकी गोलंदाज कुलदीप यादवने महत्त्वाची भूमिका बजावली. त्याने तीन षटकात 14 धावा देत चार महत्त्वाच्या विकेट काढल्या. या चार विकेटसह कुलदीपच्या खात्यात एकूण 17 विकेट जमा झाल्या आहेत. सध्या पर्पल कॅप युजवेंद्र चहलकडे आहे. कुलदीप चहलपेक्षा फक्त एका विकेटने मागे आहे. कुलदीप शिवाय या मॅचमध्ये केकेआरच्या उमेश यादवनेही चांगली गोलंदाजी केली. दिल्लीच्या तीन विकेट घेऊन तो सुद्धा पर्पल कॅपसाठी टॉप 5 च्या शर्यतीत दाखल झाला आहे.

पर्पल कॅपच्या शर्यतीतील टॉप पाच गोलंदाज

राजस्थान रॉयल्सच्या चहलचा दबदबा

राजस्थान रॉयल्सचा युजवेंद्र चहल अजूनही पहिल्या स्थानावर आहे. चहलने आठ सामन्यात 18 विकेट घेतलेत. कुलदीप दुसऱ्या स्थानावर आहे. त्याने आठ सामन्यात 17 विकेट घेतल्यात. सनरायजर्स हैदराबादचा उमरान मलिक आणि टी. नटराजन यांनी सुद्धा आठ सामन्यात 15 विकेट घेतल्यात. ते अनुक्रमे तिसऱ्या आणि चौथ्या स्थानावर आहेत. उमेश यादव नऊ सामन्यात 14 विकेट घेऊन पाचव्या स्थानावर आहे.