IPL 2026 : मुंबई इंडियन्सविरुद्ध संजू सॅमसनचं वादळ घोंघावलं, शतकी खेळीसह नोंदवले इतके सारे विक्रम

आयपीएल 2026 स्पर्धेत चेन्नई सुपर किंग्स आणि मुंबई इंडियन्स यांच्यात वानखेडे स्टेडियमवर सामना झाला. या सामन्यात नाणेफेकीचा कौल जिंकून मुंबई इंडियन्सने गोलंदाजीला प्राधान्य दिलं. चेन्नई सुपर किंग्सला प्रथम फलंदाजी करावी लागली आणि 20 षटकात 6 गडी गमवून 207 धावा केल्या. यात नाबाद 101 धावा एकट्या संजू सॅमसनच्या आहेत. त्याने या स्पर्धेतील दुसरं शतक ठोकलं. त्याने 54 चेंडूत 10 चौकार आणि 6 षटकार मारून शतक पूर्ण केलं. यावेळी त्याचा स्ट्राईक रेट हा 187.04चा होता. संजू सॅमसनला चेन्नई सुपर किंग्सच्या डावातील शेवटच्या चेंडूवर शतकासाठी 3 धावांची गरज होती. त्याने क्रिश भगतला शेवटच्या चेंडूवर चौकार मारला आणि शतक साजरं केलं. त्याच्या या शतकी खेळीमुळे या स्पर्धेत काही विक्रमांची नोंद करण्यात आली. चला जाणून घेऊयात संजू सॅमसनने या शतकी खेळीसह कोणते विक्रम रचले ते…

संजू सॅमसनने नोंदवले इतके सारे विक्रम

आयपीएल स्पर्धेत सर्वाधिक शतकी खेळी करणाऱ्या खेळाडूंच्या यादीत संजू सॅमसन आता पाचव्या स्थानी आहे. त्याने केएल राहुलच्या विक्रमाची बरोबरी केली. संजू सॅमसनचं आयपीएलमधील हे पाचवं शतक आहे. या यादीत विराट कोहली 8 शतकांसह पहिल्या स्थानावर आहे. जोस बटलरने 7, ख्रिस गेलने 6 शतकं ठोकली आहेत.

संजू सॅमसनचं एकाच पर्वात हे दुसरं शतक आहे. तसेच चेन्नई सुपर किंग्ससाठी दुसरं शतक ठरलं आहे. यापूर्वी चेन्नई सुपर किंग्साठी शेन वॉटसन, मुरली विजय, ऋतुराज गायकवाड यांनी दोन शतकं ठोकली आहेत.

टी20 क्रिकेटमध्ये संजू सॅमसनच्या नावावर हे आठवं शतक आहे. भारतीय खेळाडूंच्या शतकांच्या यादीत त्याने रोहित शर्माची बरोबरी केली आहे. रोहित शर्माच्या नावावर 8 शतकं आहेत. तर अभिषेक शर्मा आणि विराट कोहलीच्या नावावर 9 शतकं आहेत.

आयपीएल स्पर्धेत मुंबई इंडियन्सविरुद्ध चेन्नई सुपर किंग्सचा हा तिसरा मोठा स्कोअर आहे. यापू्र्वी 2021 मध्ये 218, 2008 मध्ये 208, 2026 मध्ये 207 आणि 2024 मध्ये 206 धावा केल्या होत्या.

संजू सॅमसनने या स्पर्धेत दिल्ली कॅपिटल्सविरुद्ध 56 चेंडूत नाबाद 115 धावा केल्या होत्या. तर राजस्थान रॉयल्ससाठी खेळताना 2021 मध्ये पंजाब किंग्स, 2019 मध्ये सनरायझर्स हैदराबाद आणि 2017 मध्ये रायझिंग पुणे सुपरजायंट्सविरुद्ध शतक ठोकलं होतं.