SRH vs LSG: हैदराबादच्या 3 विकेट पडल्यानंतर संजीव गोयंका यांच्यावर कॅमेरा, त्यांनी असं काही केलं

आयपीएल 2026 स्पर्धेतील दहाव्या सामन्यात लखनौ सुपर जायंट्स आणि सनरायझर्स हैदराबाद हे संघ आमनेसामने आले आहेत. या सामन्यात नाणेफेकीचा कौल हा लखनौ सुपर जायंट्सच्या बाजूने लागला. कर्णधार ऋषभ पंतने क्षणाचाही विलंब न करता प्रथम गोलंदाजी स्वीकारली. खरं तर दुपारचा सामना असल्याने हा निर्णय अनेकांना आश्चर्यकारक वाटला. पण ऋषभ पंतला गोलंदाजीवर पूर्ण विश्वास होता आणि तसंच घडलं. सनरायझर्स हैदराबादचा डाव पावरप्लेमध्ये गडगडला. आघाडीचे तीन फलंदाज धडाधड बाद झाले. वेगवान गोलंदाज मोहम्मद शमी हा सनरायझर्स हैदराबादसाठी डोकेदुखी ठरला. त्याने अभिषेक शर्मा आणि ट्रॅव्हिस हेडला बाद केलं. त्यामुळे हैदराबादच्या धावगतीला ब्रेक बसला. हैदराबादचा संघ पावर प्लेच्या 6 षटकात 3 गडी गमवून फक्त 22 धावा करू शकला.

कर्णधार ऋषभ पंतने पहिलं षटक मोहम्मद शमीच्या हाती सोपवलं. त्याचा सामना करणं ट्रेव्हिस हेडला अडचणीचं गेलं. एक धाव घेतली आणि अभिषेक शर्माला स्ट्राईक दिली. अभिषेक शर्माला एक चेंडू खेळवला आणि दुसऱ्या चेंडूवर तंबूचा रस्ता दाखवला. अभिषेक शर्माला खातंही खोलता आलं नाही. त्यानंतर दिग्वेश राठीने 7 धावा दिल्या आणि तिसरं षटक टाकण्यासाठी पुन्हा एकदा मोहम्मद शमी आला. त्याने या षटकाच्या पहिल्याच चेंडूवर ट्रेव्हिस हेडची विकेट काढली. त्यामुळे लखनौचे चाहते खूपच खूश झाले. चौथं षटक प्रिन्स यादवला दिलं आणि या षटकाच्या तिसऱ्या चेंडूवर इशानची विकेट गेली. त्यामुळे लखनौ फ्रेंचायझीचे मालक संजीव गोयंका खूपच खूश झाले.

सनरायझर्स हैदराबादची विकेट पडल्यानंतर कॅमेरा संजीव गोयंका यांच्या प्रतिक्रिया टिपत होता. प्रत्येक विकेटनंतर संजीव गोयंका आनंद साजरा करत होते. तसेच प्रार्थना करताना दिसले. हातात असलेला फोटोला नमन करताना दिसले. त्याचा हा व्हिडीओ सोशल मीडियावर व्हायरल होत आहे. त्याच्या या रिएक्शनवर सोशल मीडियावर प्रतिक्रिया नोंदवल्या जात आहेत.