आयपीएल 2024 स्पर्धेतील 32 वा सामना गुजरात टायटन्स आणि दिल्ली कॅपिटल्स यांच्यात पार पडला. या सामन्यावर पूर्णपणे दिल्ली कॅपिटल्सची पकड दिसली. प्रथम फलंदाजी करणाऱ्या गुजरातला काही खास करता आलं नाही. दिल्ली कॅपिटल्सच्या गोलंदाजांनी गुजरातची दाणादाण उडवली. एकाही फलंदाजाला डोकं वर काढू दिलं नाही. त्यामुळे ऑरेंज कॅपच्या गुणतालिकेला जराही धक्का बसला नाही. ऑरेंज कॅप विराट कोहलीच्या डोक्यावर कायम आहे. त्यामुळे आता ही कॅप कोण खेचून घेतं याची उत्सुकता ताणली गेली आहे. कारण ज्या ज्या खेळाडूंना संधी असते ती त्यांना घेता येत नाही. तोपर्यंत विराट कोहली या शर्यतीत पुढे निघून जातो. त्यामुळे विराट कोहलीला मागे टाकणं खूपच कठीण झालं आहे. मुंबई इंडियन्स विरुद्धच्या सामन्यात विराट कोहलीचा डाव 3 धावांवर आटोपला होता. मात्र तरीही त्याला मागे टाकता आलं नाही. जोस बटलरची दोन शतकं, रोहित आणि सुनील नरीनचं प्रत्येकी एक शतकही अव्वल स्थान हिरावून घेऊ शकलं नाही.
विराट कोहलीने आतापर्यंत 7 सामने खेळले असून 1 शतक आणि दोन अर्धशतकांच्या जोरावर 361 धावा केल्या आहेत. नाबाद 113 ही सर्वोत्तम खेळी आहे. रियान पराग या यादीत दुसऱ्या स्थानावर आहे. 7 सामन्यात त्याने 3 अर्धशतकांच्या जोरावर 318 धावा केल्या. राजस्थानविरुद्ध शतकी खेळी करणारा सुनील नरीन 276 धावांसह तिसऱ्या स्थानावर आहे. संजू सॅमसन 276 धावांसह चौथ्या स्थानावर आहे. सुनील नरीनच्या तुलनेत संजू सॅमसनचा स्ट्राईक रेट कमी आहे. शुबमन गिल दिल्लीविरुद्ध काही खास करू शकला नाही. 6 चेंडूत 8 धावा करून बाद झाला. त्यामुळे त्याचा एकूण 263 धावा असून पाचव्या स्थानी आहे. रोहित शर्माने पंजाब किंग्सविरुद्ध 3 धावा करताच त्याचं टॉप 5 मधील स्थान निघून जाईल.
दिल्ली कॅपिटल्सने नाणेफेकीचा कौल जिंकून प्रथम गोलंदाजी करण्याचा निर्णय केला. हा निर्णय गोलंदाजांनी योग्य ठरवला. कारण गुजरात टायटन्सला 17.3 षटकात सर्वबाद करत 89 धावांवर रोखलं. विजयासाठी मिळालेलं 90 धावांचं आव्हान दिल्ली कॅपिटल्सने 4 गडी गमवून पूर्ण केलं. दिल्ली कॅपिटल्सकडून मुकेश कुमार प्रभावी गोलंदाज ठरला. त्याने 3 गडी बाद केले. तर इशांत शर्माने 2, ट्रिस्टन स्टब्सने 1 आणि खलिल अहमदने 1 गडी बाद केला.