लॉस एंजेलिस ऑलिंपिक 2028 मध्ये फक्त सहा संघांना परवानगी, पाकिस्तानची चिंता वाढली

वर्ल्डकप स्पर्धेप्रमाणे ऑलिंपिक स्पर्धेत जेतेपदाचं स्वप्न उराशी बाळगून खेळाडू आणि संघ मैदानात उतरत असतात. दर चार वर्षांनी भरणाऱ्या खेळाच्या कुंभमेळ्यात सुवर्ण पदकासाठी चढाओढ पाहायला मिळते. खेळ कुंभमेळ्यात आता क्रिकेटची एन्ट्री झाली आहे.लॉस एंजेलिस येथे होणाऱ्या ऑलिंपिक स्पर्धेत टी20 फॉर्मेटमध्ये क्रिकेट स्पर्धा भरवली जाणार आहे. पण या स्पर्धेसाठी फक्त सहा संघांची निवड केली जाणार आहे. आंतरराष्ट्रीय ऑलिंपिक समितीने स्पष्ट केलं की, ऑलिंपिक खेळांच्या 128 वर्षांच्या इतिहासात प्रथमच क्रिकेटची ओळख करून दिली जाणार आहे. यात पुरुष आणि महिला दोन्ही गटात प्रत्येकी सहा संघ असतील. आयसीसी टी20 संघ क्रमवारीच्या आधारे पात्र ठरतील. म्हणजेच ऑलिंपिक पात्रतेच्या वेळी आयसीसी संघ क्रमवारीचा विचार करून 6 संघांची निवड केली जाईल.

आंतरराष्ट्रीय क्रिकेट परिषद अर्थात 12 पूर्ण सदस्यीय संघांची यादी ऑलिंपिक समितीकडे पाठवेल. या यादीत संघांच्या क्रमवारीच्या आधारे सहा संघ ऑलिंपिक स्पर्धेत खेळवले जातील. पुढील दोन वर्षांत एखाद्या सहकारी सदस्य देशाचा कोणताही संघ आयसीसी टी२० संघ क्रमवारीत टॉप-6 मध्ये आला तर तो संघ पात्र ठरेल.भारत सध्या टी20 संघ क्रमवारीत अव्वल स्थानावर आहे. तर ऑस्ट्रेलिया दुसऱ्या स्थानावर आहे. इंग्लंड आणि न्यूझीलंड अनुक्रमे तिसऱ्या आणि चौथ्या स्थानावर आहेत. वेस्ट इंडिजचा संघ पाचव्या स्थानावर आहे. तर दक्षिण आफ्रिका सहाव्या स्थानावर आहे.

पाकिस्तान संघ सातव्या स्थानावर आहे. याचा अर्थ असा की फक्त अव्वल 6 संघच ऑलिंपिकसाठी पात्र ठरतील. जर पुढील वर्षभरात पाकिस्तानी संघ टॉप 6 मध्ये आला नाही तर तो ऑलिंपिकमधून निश्चितच बाहेर पडेल. त्यामुळे आगामी टी20 मालिका पाकिस्तान संघासाठी खूप महत्त्वाची असणार आहे.

क्र.	संघ	सामने	गुण	रेटिंग
1	भारत	75	20170	269
२	ऑस्ट्रेलिया	48	12417	259
3	इंग्लंड	50	12688	254
4	न्यूझीलंड	59	14652	248
5	वेस्ट इंडीज	59	14587	247
6	दक्षिण आफ्रिका	46	11345	247
7	पाकिस्तान	59	13845	235
8	श्रीलंका	48	11159	232
9	बांगलादेश	56	12797	229
10	अफगाणिस्तान	42	9322	222
11	झिम्बाब्वे	58	11429	197
12	आयर्लंड	50	9775	196