Video : शाहीन आफ्रिदीने विकेट घेताच केलेल्या अ‍ॅक्शनची रंगली चर्चा, पाहा काय केलं ते

पाकिस्तान आणि बांगलादेश यांच्यात कसोटी सामना सुरु आहे. या सामन्यात बांगलादेशने पाकिस्तानची हवा काढली आहे. पाकिस्तानने पहिल्या डावात 448 धावा केल्या आणि डाव घोषित केला. बांगलादेशला या धावा गाठणं कठीण होईल असं वाटत होतं. पण भलतंच घडलं. बांगलादेशने पाकिस्तानला जशाच तसं उत्तर दिलं. बांगलादेशकडून मधल्या फळीत मुशफिकुर रहिमने 341 चेंडूचा सामना 191 धावा केल्या. त्याचं द्विशतक अवघ्या 9 धावांनी हुकलं. तर लिटन दासने 56 आणि मेहिदी हसन मिराज याने 77 धावांची खेळी केली. तर शदमानने 93 धावांची खेळी करून बांगलादेशला चांगली सुरुवात करून दिली होती. पहिल्या डावात 565 धावा करत 127 धावांची आघाडी घेतली. ही आघाडी मोडून काढताना पाकिस्तानने दिवसअखेर 1 गडी गमवून 23 धावा केल्या. शाहीन आफ्रिदीने 30 षटकं टाकली आणि 88 धावा देत 2 गडी बाद केले. असं सर्व सामन्याचं स्वरूप असताना पाकिस्तानचा वेगवान गोलंदाज शाहीन आफ्रिदीची अ‍ॅक्शन चर्चेत आहे. शाहीनने बांगलादेशच्या हसन मेहमूदला बाद केलं आणि हातात बाळ असल्याची अ‍ॅक्शन केली. बाळाला हातात घेऊ झोका घेत असल्याचं दाखवून दिलं.

शाहीन आफ्रिदी आता वडिलांच्या भूमिकेत आला आहे. त्याच्या घरी बाळाचं आगमन झालं आहे. शाहीन आणि अंशा यांनी आपल्या बाळाचं नाव अली यार असं ठेवलं आहे . शाहीन सध्या कसोटी सामना खेळत असून रविवारी शेवटचा दिवस आहे. या दिवसाचा खेळ संपला की शाहीन अफ्रिदी कुटुंबियांना भेटण्यासाठी कराचीत जाणार आहे. त्यानंतर 30 ऑगस्टपासून दुसऱ्या कसोटी सामन्यासाठी हजेरी लावेल. शाहीन आणि अंशा यांचा निकाह फेब्रुवारी 2023 मध्ये कराचीत झाला होता. या निकाह सोहळ्यात जवळचे नातेवाईक उपस्थित होते. त्यानंतर सप्टेंबर 2023 मध्ये लग्नाचं रिसेप्शन आयोजित केलं होतं. यात दिग्गजांनी हजेरी लावली होती.

शाहीन आफ्रिदी पाकिस्तानसाठी आतापर्यंत 30 कसोटी, 53 वनडे आणि 70 टी20 सामने खेळला आहे. कसोटीत त्याने 110 हून अधिक विकेट्स घेतल्या आहेत. वनडेत 104, तर टी20 96 विकेट आहेत. पाकिस्तान क्रिकेट बोर्डाने शाहीन आफ्रिदीवर टी20 क्रिकेट संघाची धुरा सोपवली होती. पण संघाची निराशाजनक कामगिरी पाहता त्याला दूर करण्यात आलं. शाहीन फक्त एका मालिकेतच संघाचा कर्णधार होता.