तुमच्या घरातही असू शकतो साप, या 5 जागा म्हणजे सापांचे माहेरघर; लपून करू शकतो हल्ला
Snake Hiding Spots : साप अगदी लहान फटींमधूनही घरात शिरू शकतात आणि अनपेक्षित ठिकाणी लपून बसू शकतात. साप लपण्याची 5 ठिकाणे खालीलप्रमाणे असू शकतात.
साप पाहताच अनेकांची झोप उडते, जर साप तुमच्या घरात आढळला तर ही चिंतेची बाब ठरू शकते. कारण साप अनेकदा नदी, शेत किंवा जंगलाजवळ आढळतात आणि जर तुमच्या घरात साप येण्याची शक्यता आणखी वाढते. उन्हाळा सुरू होताच जंगली प्राणी, विशेषतः साप, मानवी वस्तीकडे वळू लागतात. तुम्हाला असे वाटत असेल की घराचे दरवाजे बंद केले की चिंता नाही. मात्र साप अतिशय बारीक फटीतूनही घरात प्रवेश करू शकतात. घरातील काही ठिकाणांकडे लोक दुर्लक्ष करतात आणि हीच ठिकाणे सापांसाठी सुरक्षित लपण्याची जागा ठरतात. घरातील अशी कोणती ठिकाणे आहेत, जिथे साप लपू शकतात याबाबत सविस्तर माहिती जाणून घेऊयात.
अंधार असणारे आणि ओलसर कोपरे
सापांना थंड आणि अंधार असणाऱ्या जागा खूप आवडतात. तुमच्या स्टोअररूममध्ये ठेवलेले जुने बॉक्स, भंगार सामान किंवा जिन्याखालील जागा त्यांच्यासाठी लपण्याची उत्तम जागा असते. कारण या ठिकाणी लोकांचा वावर खूप कमी असतो. जर तुमच्या स्टोअररूममध्ये जुने सामान खूप साचले असेल, तर ते वेळोवेळी व्यवस्थित करा आणि अचानक तिथे जाऊ नका. अन्यथा तुम्हाला साप आढळू शकतो.
बाथरूम आणि ड्रेनेज पाइप
बाथरूममधील सिंक आणि टॉयलेट पॉटमधूनही साप घरात शिरू शकतात. पाइपलाइनमधील ओलावा आणि तिथे असणारे बेडूक किंवा उंदीर सापांना आकर्षित करतात. जर ड्रेनेजची जाळी तुटलेली असेल, तर ती सापांसाठी खुला मार्ग बनू शकते. यातून साप घरात प्रवेश करू शकतात.
किचनमधील उपकरणे आणि कपाटे
किचनमध्ये फ्रिजच्या मागील उबदार जागा किंवा ओव्हनखालील रिकामी जागा सापांना आकर्षित करू शकते. याशिवाय जमिनीवर ठेवलेली कपड्यांची कपाटाच्या खाली मोकळी जागा असेल तर त्याच्या खालीही साप लपू शकतात. तसेच बूट रॅक किंवा बाहेर ठेवलेल्या बुटांमध्येही साप अनेकदा गुंडाळून बसतात. त्यामुळे कोणतीही बंद जागा किंवा वस्तू वापरण्यापूर्वी एकदा खात्री करा.
तसेच जर घरातील बराच काळ बंद असलेल्या जागांची साफसफाई करायची असेल, तर थेट हात लावण्याऐवजी आधी काठी किंवा लांब वस्तूने हलवून ती जागा सुरक्षित आहे का हे तपासा आणि त्यानंतर त्या जागी साफसफाई करा. अशाप्रकारे तुम्ही सापांपासून सुरक्षित राहू शकता.
