IND vs SA T 20 Series: करीयरमधली महत्त्वाची ‘ती’ 20 मिनिटं, राहुल द्रविड यांनी घेतला Umran Malik चा क्लास

Rahul Dravid-Umran Malik

Image Credit source: twitter

मुंबई: भारत आणि दक्षिण आफ्रिकेमध्ये (IND vs SA) येत्या 9 जूनपासून पाच टी-20 सामन्यांची मालिका सुरु होत आहे. दिल्लीमधील अरुण जेटली स्टेडियमवर पहिली लढत होणार आहे. भारतीय संघाने कालपासून सराव सुरु केलाय. भारताकडून अनेक युवा खेळाडू या मालिकेत खेळताना दिसणार आहेत. IPL 2022 मध्ये दमदार कामगिरी करणाऱ्या अनेक युवा चेहऱ्यांना निवड समितीने संधी दिली आहे. रोहित शर्मा, विराट कोहली, जसप्रीत बुमराह आणि रवींद्र जाडेजा सारख्या सीनियर खेळाडूंना विश्रांती दिली आहे. काल नेट्समध्ये उमरान मलिक आणि अर्शदीप सिंह या खेळाडूंनी जोरदार सराव केला. युवा उमरान मलिकची (Umaran Malik) तर आयपीएलपासून चर्चा आहे. यंदाच्या आयपीएलमध्ये त्याने खूप वेगवान चेंडू टाकले. सध्याच्या घडीला भारतातीत तो सर्वात वेगवान गोलंदाज आहे. काल नेट्समध्ये भारताचे हेड कोच राहुल द्रविड यांनी उमरान मलिकशी संवाद साधला. जवळपास 20 मिनिट त्यांनी उमरान मलिकशी चर्चा केली. त्याचा मास्टर क्लास घेतला. त्याला महत्त्वाच्या टीप्स देताना ते दिसले. उमरान मलिकशी बोलत असताना, ते सतत हाताने विकेटकडे निर्देश करत होते.

पारस म्हांब्रे यांच्या मार्गदर्शनाखाली सराव

राहुल द्रविड बोलत असताना, उमरान मलिक शांतपणे एकाग्रतेने ते सर्व ऐकत होता. शक्य असले तितक्या वेगात गोलंदाजी कर, असा भारतीय टीम मॅनेजमेंटकडून उमरान मलिकला स्पष्ट संदेश आहे. भारतीय संघासाठी दीर्घकाळ डोळ्यासमोर ठेऊन उमरान मलिकला तयार करण्याची द्रविड यांची रणनिती आहे. नुकत्याच संपलेल्या आयपीएलमध्ये उमरान मलिकने 157 किलोमीटर प्रतितास वेगाने त्याने गोलंदाजी केली. नेट्स मध्ये उमरानने भारताचे वेगवान गोलंदाजी प्रशिक्षक पारस म्हांब्रे यांच्या मार्गदर्शनाखाली सराव केला. संपूर्ण नेट सेशन दरम्यान राहुल द्रविड काही नोट्स बनवत होते.

उमरानच्या वेगाची पाकिस्तानात चर्चा

आयपीएलमध्ये उमरान मलिक सनरायजर्स हैदराबादकडून खेळला. उमरान मलिक मूळचा जम्मू-काश्मीरचा आहे. उमरान मलिकवर ज्या पद्धतीची मेहनत घेतली जातेय, त्यावरुन त्याला पहिल्या टी 20 सामन्यात संधी मिळण्याची शक्यता व्यक्त केली जात आहे. उमरान मलिकच्या वेगाची पाकिस्तानातही चर्चा आहे.