SRH vs PBKS : हैदराबादकडे पंजाबचा हिशोब करण्याची संधी, ऑरेंज आर्मी पलटवार करणार?
Sunrisers Hyderabad vs Punjab Kings Preview : पंजाब किंग्स विरुद्ध सनरायजर्स हैदराबाद दोन्ही संघांची 19 व्या मोसमात आमनेसामने येण्याची ही दुसरी वेळ असणार आहे. याआधी पंजाबने हैदराबादवर विजय मिळवला होता. आता हैदराबादकडे परतफेड करण्याची संधी आहे.
आयपीएल स्पर्धेच्या 19 व्या मोसमातील 49 व्या सामन्यात बुधवारी 6 मे रोजी सनरायजर्स हैदराबाद विरुद्ध पंजाब किंग्स विरुद्ध 2 हात करणार आहे. उभयसंघातील हा सामना हैदराबादमधील राजीव गांधी स्टेडियममध्ये होणार आहे. सामन्याला संध्याकाळी 7 वाजून 30 मिनिटांनी सुरुवात होणार आहे. हैदराबादचा हा या मोसमातील 11 वा आणि पंजाबचा दहावा सामना असणार आहे. दोन्ही संघांनी प्रत्येकी 6-6 सामने जिंकले आहेत. त्यामुळे दोघांपैकी कोणता संघ आणखी एक विजय मिळवून प्लेऑफच्या दिशेने पुढचं पाऊल टाकणार? हे पाहणं महत्त्वाचं ठरणार आहे. तसेच हैदराबादकडे या सामन्यात एक हिशोब करण्याची संधी आहे. हैदराबादला हा सामना जिंकून गेल्या पराभवाची परतफेड करण्याची संधी आहे. हैदराबादसोबत गेल्या सामन्यात काय झालं होतं? हे आपण जाणून घेऊयात.
हैदराबाद पलटवार करणार?
पंजाब विरुद्ध हैदराबाद यांच्यात 11 एप्रिलला न्यू चंडीगडमध्ये सामना खेळवण्यात आला होता. हैदराबाद टीम या सामन्यात 219 धावांचा बचाव करण्यात अपयशी ठरली होती. पंजाबने 220 धावांचं आव्हान हे सुरक्षित आणि एकतर्फी फरकाने पूर्ण केलं. पंजाबने 18.5 ओव्हरमध्ये 4 विकेट्स गमावून 223 धावा केल्या होत्या. आता हैदराबाद या पराभवाची वसूली करणार का? हे पाहणं महत्त्वाचं ठरणार आहे.
दोन्ही संघांची पॉइंट्स टेबलमधील स्थिती
ताज्या आकडेवारीनुसार, पंजाब किंग्स पॉइंट्स टेबलमध्ये अव्वल स्थानी आहे. पंजाबने या मोसमात 9 सामने खेळले आहेत. पंजाबने 6 सामने जिंकले आहेत. तर 2 वेळा पंजाबचा पराभव झाला आहे. पंजाबचा केकेआर विरुद्धचा सामना हा पावसामुळे वाया गेला. त्यामुळे पंजाबला 1 गुण देण्यात आला. पंजाबच्या खात्यात एकूण 13 गुण आहेत. पंजाबचा नेट रनरेट हा +0.855 असा आहे.
तर सनरायजर्स हैदराबादने 10 पैकी 6 सामने जिंकलेत. हैदराबादला 4 सामन्यांत पराभूत व्हावं लागलं आहे. हैदराबादच्या खात्यात 12 गुण आहेत. तर हैदराबादचा नेट रनरेट हा +0.644 असा आहे.
हेड टु हेड रेकॉर्ड
दरम्यान हैदराबाद पंजाबवर वरचढ असल्याचं आकड्यांवरुन स्पष्ट होतं. उभयसंघात आतापर्यंत एकूण 25 सामने खेळवण्यात आले आहेत. हैदराबादने या 25 पैकी सर्वाधिक 17 सामन्यांमध्ये विजय मिळवला आहे. तर हैदराबादला 8 सामनेच जिंकता आले आहेत. आता हैदराबाद पंजाबवर मात करुन गेल्या पराभवाचा हिशोब करणार का? हे पाहणं महत्त्वाचं ठरणार आहे.
