T20 WC 2026, Super 8 Point Table : सुपर 8 फेरीत इंग्लंडचा एकाच वेळी तीन संघाना धक्का, झालं असं की..
टी20 वर्ल्डकप 2026 स्पर्धेतील सुपर 8 फेरीतील गट 2 मध्ये श्रीलंका आणि इंग्लंड हे संघ आमनेसामने आले होते. या सामन्यात इंग्लंडने श्रीलंकेला धावांनी पराभूत केलं. या सुपर 8 फेरीतील गुणतालिकेत मोठी झेप घेतली आहे. एकाच विजयात तीन संघांना धक्का दिला आहे.
टी20 वर्ल्डकप स्पर्धेच्या सुपर 8 फेरीत इंग्लंडने श्रीलंकेला 51 धावांनी पराभूत केलं. खरं तर पहिल्या डावात इंग्लंडची फलंदाजी पाहून श्रीलंका सहज जिंकेल असं वाटत होतं. पण निकाल इंग्लंडच्या बाजूने लागला. इंग्लंडने भेदक गोलंदाजीचं प्रदर्शन केलं आणि श्रीलंकेला बॅकफूटवर ढकललं. इंग्लंडने श्रीलंकेसमोर विजयासाठी 146 धावांचं आव्हान ठेवलं होतं. हे आव्हान गाठताना श्रीलंकेला फक्त 95 धावा करता आल्या. या सामन्यात श्रीलंकेचा 51 धावांनी पराभव झाला आहे. त्यामुळे श्रीलंकेचा नेट रनरेट कमालीचा घसरला आहे. तर इंग्लंडला जबर फायदा झाला आहे. इंग्लंडचा सुपर 8 फेरीतील उर्वरित दोन सामने पाकिस्तान आणि न्यूझीलंडविरुद्ध आहे. यापैकी एक सामना जिंकला तर उपांत्य फेरीतील जागा पक्की होणार आहे. पण इतर संघांचं गणित मात्र बिघडलं आहे.
सुपर 8 फेरीच्या गुणतालिकेत काय झालं?
टी20 वर्ल्डकप सुपर 8 फेरीतील गट 2 मध्ये श्रीलंका, इंग्लंड, पाकिस्तान आणि न्यूझीलंड हे संघ आहेत. श्रीलंकेचा सुपर 8 फेरीतील पहिला सामना इंग्लंडशी झाला. हा सामना इंग्लंडने जिंकला. या विजयासह गट 2 मधील गुणतालिकेत मोठी उलथापालथ पाहायला मिळत आहेत. कारण इंग्लंडने विजय मिळवून सुपर 8 फेरीतील गट 2 गुणतालिकेत पहिल्या स्थानावर झेप घेतली आहे. यासह श्रीलंका, पाकिस्तान, न्यूझीलंड यांना मोठा धक्का बसला. इंग्लंडची उपांत्य फेरीच्या दिशेने वाट सुकर झाल्याचं दिसत आहे. तर श्रीलंका, पाकिस्तान आणि न्यूझीलंडला उपांत्य फेरीसाठी उर्वरित दोन्ही सामन्यात विजय मिळवणं भाग आहे. अन्यथा स्पर्धेतील आव्हान संपुष्टात येईल.
सुपर 8 फेरीतील गट 2 मध्ये इंग्लंडचा संघ 2 गुण आणि +2.550 नेट रनरेटसह पहिल्या स्थानावर आहे. पाकिस्तान आणि न्यूझीलंडचा पहिला सामना पावसामुळे झाला नाही. त्यामुळे दोन्ही संघांना प्रत्येकी 1 गुण विभागून देण्यात आला. तसेच नेट रनरेट हा 0 आहे. दुसरीकडे, श्रीलंकेचा पहिल्या सामन्यात दारूण पराभव झाला आहे. त्यामुळे खात्यात एकही गुण नाही. उलट नेट रनरेट हा -2.550 इतका झाला आहे. त्यामुळे उर्वरित दोन सामन्यात विजय मिळवण्याशिवाय पर्याय नाही. जर श्रीलंकेने दोन पैकी एक सामना गमावला तर स्पर्धेतील आव्हान संपुष्टात येईल.
