यशस्वी जयस्वाल सापडला अडचणीत, आकाश चोप्राने केलं उघड! आता टी20 वर्ल्डकपमध्ये काय होणार?

यशस्वी जयस्वाल भारतीय क्रिकेट संघातील उभरता तारा आहे. अल्पावधीतच त्याने काही विक्रमांना गवसणी घातली आहे. डावखुऱ्या यशस्वी जयस्वालने क्रिकेटच्या प्रत्येक फॉर्मेटमध्ये आपली मोहोर उमटवली आहे. कसोटी, टी20 आणि वनडे क्रिकेटमध्ये जबरदस्त कामगिरी केली आहे. इंग्लंड विरुद्धच्या कसोटी मालिकेत त्याने दोन द्विशतकं ठोकली. त्यामुळे त्याच्या नावाचा उदो उदो झाला. पण आयपीएलमध्ये येताच यशस्वी जयस्वालची बॅट शांत झाली आहे. यशस्वी जयस्वालची बॅटिंग शैली पूर्णपणे फेल गेल्याचं दिसत आहे. वारंवार प्रयत्न करूनही हव्या तशा धावा येत नाही. त्याने आतापर्यंत खेळलेल्या 11 सामन्यात एक शतक आणि एक अर्धशतक ठोकलं आहे. आता त्याची ही निराशाजनक कामगिरी पाहून माजी क्रिकेटपटू आणि प्रसिद्ध समालोचक आकाश चोप्रा याने एक प्रश्न उपस्थित केला आहे. यशस्वीच्या एका चुकीचा त्याला फटका बसल्याचं त्याने अधोरेखित केलं आहे.

यशस्वी जयस्वाल आयपीएलमध्ये लेफ्ट आर्म गोलंदाजाला विकेट देऊन बसला आहे. खासकरून आखुड टप्प्याच्या चेंडूवर विकेट गमावली आहे. आकाश चोप्राला त्याची ही उणीव दिसून आली आहे. त्याचा फटकी टीम इंडियाला टी20 वर्ल्डकप स्पर्धेत बसू शकतो. आकाश चोप्राने आपल्या यूट्यूब चॅनेलवर सांगितलं की, “जेव्हा कधी धावांचा पाठलाग करण्याची पाळी येते, तेव्हा यशस्वी जयस्वाल लेफ्ट आर्म पेसर्सला विकेट देऊन बसतो. तो आखुड टप्प्याच्या चेंडूवर पहिल्यांदाच आऊट झालेला नाही. अनेकदा तो बाउंसरवर विकेट देऊन बसला आहे.” आकाश चोप्राचं हे निरीक्षण अगदी बरोबर आहे.

यशस्वी जयस्वालने मुंबई इंडियन्स विरुद्धच्या सामन्यात एक शतक ठोकलं आहे. त्याच्या खेळीनंतर टीम इंडियाचा कर्णधार रोहित शर्माने त्याचं कौतुक केलं होतं. त्यानंतर त्याची निवडही टी20 वर्ल्डकप संघात झाली आहे. पण यशस्वी जयस्वाल सलग धावा करताना दिसत नाही. असंच राहिलं तर फॉर्म गमवण्यास वेळ लागणार नाही. अमेरिका वेस्ट इंडिजमध्ये टी20 वर्ल्डकप स्पर्धेत त्याच्या अडचणीचा फायदा घेतला जाऊ शकतो. दुसरीकडे, ही चूक दुरुस्त करण्यास यशस्वी जयस्वालकडे जास्त वेळ नाही. आयपीएलमध्ये उर्वरित सामन्यात त्याच्याकडून मोठ्या खेळीची अपेक्षा आहे. त्यात राजस्थान रॉयल्सने जेतेपद मिळवलं आणि त्यात जयस्वालची भूमिका मोलाची ठरली तर तो टी20 वर्ल्डकपमध्ये प्लेइंग 11 चा भाग असेल.