Yuzvendra Chahal | वर्ल्ड कप 2023 साठी डच्चू, युझवेंद्र चहल याचा या टीम कडून खेळण्याचा निर्णय!
Team India Yuzvendra Chahal | भारतात 5 ऑक्टोबरपासून सुरु होणाऱ्या आयसीसी वनडे वर्ल्ड कपसाठी बीससीआय निवड समितीने फिरकीपटू युझवेंद्र चहल याची टीम इंडियात निवड केली नाही.
मुंबई | आयसीसी वनडे वर्ल्ड कप 2023 स्पर्धेला 5 ऑक्टोबरपासून सुरुवात होणार आहे. वर्ल्ड कपच्या बरोबर 1 महिन्याआधी बीसीसीआय निवड समितीने 5 सप्टेंबर रोजी भारतीय संघाची घोषणा केली. आशिया कप 2023 च्या टीममधूनच वर्ल्ड कपसाठी एकूण 15 खेळाडूंची निवड करण्यात आली. यातून प्रसिद्ध कृष्णा आणि तिलक वर्मा या दोघांना डच्चू देण्यात आला. तसेच निवड समितीने आर अश्विन, युझवेंद्र चहल, शिखर धवन आणि संजू सॅमसन या चौघांबाबतही विचार केला नाही. आता वर्ल्ड कपमध्ये संधी न मिळाल्याने युझवेंद्र चहल याने मोठा निर्णय घेतला आहे.
यूझवेंद्र चहलने वर्ल्ड कपमध्ये संधी न मिळाल्याने त्याने काऊंटी क्रिकेट खेळण्याचा निर्णय घेतला आहे. चहल केंट टीमकडून काऊंटी क्रिकेट खेळू शकतो. चहलचं या निमित्ताने काऊंटी डेब्यू होऊ शकतं. ‘टाईम्स ऑफ इंडिया’नुसार, वर्ल्ड कपसाठी भारतीय संघाची घोषणा झाल्यानंतर काऊंटी क्रिकेट खेळण्याचा निर्णय घेतला आहे. चहलला बीसीसीआयकडून काउंटी क्रिकेट खेळण्यासाठी ना हरकत प्रमाणपत्र (एनओसी) देण्यात आलं आहे.
सूत्रांनी दिलेल्या माहितीनुसार, “केंट काउंटी क्लब क्रिकेट याबाबत अधिकृत घोषणा करु शकतं. चहल केंटसाठी 3-4 सामने खेळू शकतो. बीसीसीआयने चहलला एनओसी दिलेली आहे. टीम इंडियाला जेव्हा केव्हाही चहलची गरज असेल, तेव्हा तो संघात दाखल होईल”.
राजस्थान रॉयल्सचं सूचक ट्विट
No context Yuzi bhai county announcement pic.twitter.com/e6MGrBxchn
— Rajasthan Royals (@rajasthanroyals) September 6, 2023
युझवेंद्र चहल हा आयपीएलमध्ये राजस्थान रॉयल्स टीमकडून खेळतो. आता चहल काऊंटी खेळण्यासाठी सज्ज झालाय अन् राजस्थान रॉयल्स टीमकडून ट्विट नाय, असं कसं होईल. राजस्थान टीमने चहलबाबत सूचक ट्विट केलं. या ट्विटमध्ये दिग्गज अभिनेत्री हेमा मालिनी यांचा केंट जाहीरातीतील फोटो आहे.
आयसीसी वर्ल्ड कप 2023चा धावता आढावा
आयसीसी वनडे वर्ल्ड कपचं भारतात 2011 नंतर 12 वर्षांनी आयोजन करण्यात आलं आहे. या वर्ल्ड कप स्पर्धेला 5 ऑक्टोबरपासून सुरुवात होणार आहे. तर 19 नोव्हेंबरला फायनल सामना पार पडणार आहे. वर्ल्ड कपमधील पहिला आणि अंतिम सामना हा नरेंद्र मोदी स्टेडियम अहमदाबादमध्ये होणार आहे. या दरम्यान एकूण 45 दिवसांमध्ये देशातील 10 ठिकाणी 48 सामने पार पडणार आहेत. या स्पर्धेत एकूण 10 संघ सहभागी होणार आहेत. प्रत्येक टीम इतर 9 संघाविरुद्ध प्रत्येकी 1 सामना खेळणार आहे. टीम इंडिया वर्ल्ड कपमधील आपला पहिला सामना हा 8 ऑक्टोबर रोजी ऑस्ट्रेलिया विरुद्ध खेळणार आहे.
आयसीसी वर्ल्ड कप 2023 साठी टीम इंडिया | रोहित शर्मा (कॅप्टन), हार्दिक पंड्या (उपकर्णधार) , शुबमन गिल, विराट कोहली, श्रेयस अय्यर, ईशान किशन, केएल राहुल, सूर्यकुमार यादव, रविंद्र जडेजा, अक्षर पटेल, शार्दुल ठाकुर, जसप्रीत बुमराह, मोहम्मद शमी, मोहम्मद सिराज आणि कुलदीप यादव.
