Sunil Gavaskar : सुनील गावस्कर पाकिस्तानी क्रिकेटपटूच्या खरेदीवर खवळले, सरळ बोलले ‘तुम्ही भारतीयांच्या मृत्यूमध्ये…’

मागच्या आठवड्यात इंग्लंडमधल्या द हंड्रेड टुर्नामेंटसाठी लिलाव झाला. या लिलावामधील एका खेळाडूची खरेदी वादात सापडली आहे. भारतीय मालकीच्या सनरायजर्स लीड्सने अबरार अहमद या पाकिस्तानी फिरकी गोलंदाजाला विकत घेतलं. हा निर्णय भारतीय क्रिकेट चाहत्यांना अजिबात पटला नाही. SRH ने राष्ट्रीय भावनांचा सन्मान केला नाही असं एक वातावरण तयार झालं. त्यातून SRH ची मालकीण काव्या मारनवर मोठ्या प्रमाणात टीका झाली. या वादावर भारताचे दिग्गज क्रिकेटपटू सुनील गावस्कर यांनी भाष्य केलं आहे. त्यांनी क्रिकेट प्रेमींच्या भावनांशी सहमती दर्शवली आहे. अबरारला काव्या मारनच्या सनरायजर्स लीड्सने 2.3 कोटी रुपये मोजून विकत घेतलं.

“द हंड्रेड टुर्नामेंटसाठी एका भारतीय संघ मालकाने पाकिस्तानी क्रिकेटपटूला विकत घेतलं, हे आश्चर्यकारक आहे. नोव्हेंबर 2008 मध्ये मुंबईवरील दहशतवादी हल्ल्ल्यानंतर भारतीय संघ मालकांनी आयपीएलसाठी पाकिस्तानी खेळाडूंकडे दुर्लक्ष सुरु केलं. तुम्ही पाकिस्तानी क्रिकेटपटूना जे पैसे देता, त्यातून ते त्यांच्या सरकारला इन्कम टॅक्स भरतात. त्यांचं सरकार त्या पैशातून शस्त्रास्त्र विकत घेतं. अप्रत्यक्षपणे तुम्ही भारतीय सैनिक, नागरिक यांच्या मृत्यूमध्ये योगदान देता. म्हणून भारतीय कंपन्या पाकिस्तानी कलाकार आणि क्रीडापटूंचा विचार करणं टाळतात” असं गावस्कर यांनी मिड-डे मधल्या कॉलममध्ये लिहिलय.

कोचकडून निर्णयाचं समर्थन

फार लांब जाण्याची गरज नाही, बांग्लादेशात हिंदुंची हत्या झाल्यानंतर बीसीसीआयने कोलकाता नाईट रायडर्सला बांग्लादेशी वेगवान गोलंदाज मुस्तफीझुर रहमानचा टीममधून रिलीज करण्याचे निर्देश दिले. जर असा निर्णय घेतला जात असेल तर भारतीय क्रिकेट आपल्या नागरिकांवर हल्ले, त्यांची हत्या सहन करणार नाही हे स्पष्ट होतं. द हंड्रेडमधील लिलावानंतर काही तासातच सनरायजर्स लीड्सला त्यांचं एक्स हँडल बंद करावं लागलं. महत्वाचं म्हणजे SRL टीमचा कोच डॅनियल विटोरीने या निर्णयाचं समर्थ केलं. पाकिस्तानचा दुसरा स्पिनर उस्मान तारीक आमच्या रडारवर असल्याचं त्याने म्हटलं.

त्यांना ही सिंपल गोष्ट कळणार नाही

“भारतीय कंपनी असो किंवा परदेशी ते पैसे देतात. मालक भारतीय असेल तर तो किंवा ती भारतीयांच्या घातपातामध्ये योगदान देतायत. हे खूप सोप आहे. डॅनियल विटोरी जे न्यूझीलंडमधून येतात त्यांना ही सिंपल गोष्ट कळणार नाही. संघ मालकाने परिस्थिती समजून घेऊन अशी खरेदी टाळली पाहिजे” असं गावस्कर बोलले.