तुमचे पार्सल वाटेत कोणी उघडले होते का? आता घरबसल्या येईल ओळखता, फक्त ही गोष्ट तपासा
ऑनलाइन शॉपिंगमध्ये होणारी फसवणूक रोखण्यासाठी ई-कॉमर्स कंपन्यांनी आता खास हीट सेन्सिटिव्ह सिक्युरिटी टेप वापरण्यास सुरुवात केली आहे. पार्सलशी छेडछाड झाल्यास यावरील ठिपक्यांचा रंग बदलतो, ज्यामुळे ग्राहकांना आपली महागडी उत्पादने सुरक्षित मिळण्यास मदत होईल.
आजच्या धावपळीच्या युगात मॉलमध्ये जाऊन खरेदी करण्यापेक्षा ऑनलाईन शॉपिंगला ग्राहकांची पहिली पसंती मिळत आहे. मात्र, ऑनलाईन शॉपिंगच्या वाढत्या लोकप्रियतेसोबतच फसवणुकीच्या घटनांमध्येही मोठी वाढ झाली आहे. अनेकदा महागड्या आयफोनच्या बदल्यात विटा किंवा साबण मिळाल्याच्या बातम्या आपण ऐकतो. या समस्येवर उपाय म्हणून एका लोकप्रिय ई-कॉमर्स वेबसाईटने आता एक अत्यंत सुरक्षित आणि अनोखी शक्कल लढवली आहे.
काय आहे हे नवीन सुरक्षा फिचर?
महागड्या वस्तूंची सुरक्षा सुनिश्चित करण्यासाठी आता विशेष प्रकारच्या सिक्युरिटी टेपचा वापर केला जात आहे. या टेपचे वैशिष्ट्य म्हणजे त्यावर लहान गुलाबी आणि लाल रंगाचे ठिपके असतात. हे ठिपके केवळ डिझाइन नसून ते एक प्रकारचे सेन्सर म्हणून काम करतात.
जर कोणी पार्सलची डिलिव्हरी करण्यापूर्वी ते अनधिकृतपणे उघडण्याचा प्रयत्न केला, तर या टेपवरील ठिपके आपला मूळ रंग बदलतात. अनेकदा चोरटे हीट गन किंवा गरम वाफेचा वापर करून पॅकिंग उघडतात जेणेकरून टेप पुन्हा चिकटवता येईल. मात्र, या नवीन तंत्रज्ञानामुळे उष्णतेचा संपर्क येताच ठिपक्यांचा रंग बदलतो. ज्यामुळे पार्सलसोबत छेडछाड झाल्याचे स्पष्टपणे दिसून येते.
जर तुम्ही महागडी वस्तू ऑर्डर केली असेल, तर पार्सल हातात घेताना खालील गोष्टींची काळजी घ्या
१. ठिपके तपासा: पार्सलवरील टेपवर असलेले गुलाबी ठिपके नीट तपासा.
२. व्हिडिओ रेकॉर्डिंग: पार्सल उघडण्यापूर्वी त्याचा स्पष्ट व्हिडिओ (Unboxing Video) तयार करा.
३. डिलिव्हरी नाकारा: जर तुम्हाला ठिपक्यांचा रंग बदललेला दिसला किंवा टेप उखडलेली वाटली, तर पार्सल स्वीकारण्यास त्वरित नकार द्या.
४. तक्रार नोंदवा: अशा परिस्थितीत संबंधित कंपनीच्या कस्टमर केअरशी संपर्क साधून पुराव्यासह तक्रार नोंदवा.
ई-कॉमर्स प्लॅटफॉर्मवरील विश्वास अधिक दृढ होणार
दरम्यान या नवीन बदलामुळे आता फसवणूक करणाऱ्यांचे धाबे दणाणले असून, ग्राहकांना आपली महागडी उत्पादने सुरक्षित मिळण्यास मोठी मदत होणार आहे. या आधुनिक तंत्रज्ञानामुळे ग्राहकांचा ई-कॉमर्स प्लॅटफॉर्मवरील विश्वास अधिक दृढ होणार आहे. केवळ तंत्रज्ञानावर अवलंबून न राहता, ग्राहकांनी स्वतः देखील जागरूक राहणे गरजेचे आहे. सुरक्षित खरेदीचा हा नवीन पॅटर्न भविष्यात ऑनलाइन फसवणुकीच्या घटनांना पूर्णपणे आळा घालण्यात महत्त्वाची भूमिका बजावेल, अशी आशा व्यक्त केली जात आहे.
