Crorepati Family Jain Diksha: संपत्तीचा मोह सोडला, संसाराचा त्याग केला! मुलींसह संन्यास घेणार करोडपती जैन कुटुंब
उदयपूरच्या जसवंतगडमधील एक श्रीमंत कुटुंब अचानक आपली संपत्ती सोडून संन्यास घेणार आहे. केवळ आई-वडीलच नव्हे, तर त्यांच्या दोन तरुण मुलीसुद्धा सांसारिक आसक्तीचे सर्व बंध तोडून ब्रह्मचर्याचा मार्ग स्वीकारत आहेत. फेब्रुवारी २०२७ रोजी हे संपूर्ण कुटुंब संन्यासी बनेल.

Crorepati Family Jain Diksha: एक हसत- खेळंत कुटुंब, कोट्यवधींची पॉपर्टी, सर्वसुखसोई अन् अक्षरश: पायाशी लोळण घेणारं ऐश्वर्य… माणसाला आयुष्यात आणखी काय हवं असतं. अशाच ऐश्वर्यसंपन्न कुटुंबाने ही सर्व संपत्ती, ऐशोरामी आयुष्य मागे सोडून संन्यास घेण्याचा निर्णय घेतला आहे. ऐकून विश्वास बसणार नाही पण ही गोष्ट खरी आहे. उदयपूरच्या जसवंतगडमधील एक श्रीमंत कुटुंब अचानक आपली संपत्ती सोडून संन्यास घेणार आहे. केवळ आई-वडीलच नव्हे, तर त्यांच्या दोन तरुण मुलीसुद्धा सांसारिक आसक्तीचे सर्व बंध तोडून ब्रह्मचर्याचा मार्ग स्वीकारत आहेत. फेब्रुवारी 2027 रोजी हे संपूर्ण कुटुंब संन्यासी बनेल.
१५ कोटींच्या उलाढालीपासून ते संन्यासापर्यंत..
ही चक्रावणारी कहाणी आहे दिलीपभाई भोगर यांची. जे एकेकाळी आपले नशीब आजमावण्यासाठी राजस्थानच्या एका छोट्या गावातून सुरतला स्थलांतरित झाले होते. त्यांनी कापड व्यवसायात रात्रंदिवस काम करून १५ कोटी रुपयांची वार्षिक उलाढाल उभारली. सुरतच्या प्रमुख कापड बाजारात त्यांची तीन दुकाने होती. पण आता दिलीप भाई (47), त्यांची पत्नी ज्योतीबेन (45), मोठी मुलगी छबी (22) आणि धाकटी मुलगी चार्वी (14) हे सर्व 8 फेब्रुवारी 2027 रोजी सुरतमध्ये एकत्र जैन दीक्षा घेणार आहेत.
मुलीने आधीच घेतलाय संन्यास…
या कुटुंबात संन्यासाची प्रक्रिया आधीच सुरू झाली होती. दिलीप भाईंची एक मुलगी, शैली, २०२३ मध्ये घर सोडून गेली आणि आता ती साध्वी दर्शिता म्हणून ओळखली जाते. आपल्या लाडक्या मुलीला ब्रह्मचर्याचा मार्ग स्वीकारताना पाहून वडिलांचे मन हळूहळू बदलले. कालपर्यंत आपला व्यवसाय वाढवण्याचे स्वप्न पाहणाऱ्या दिलीप भाईंनी अचानक आपला व्यवसाय गुंडाळायला सुरुवात केली.
मुलींना करिअर घडवण्यासाठी आणि आयुष्य जगण्यासाठी उत्तम संधी होत्या. मोठी मुलगी, छबीने ग्राफिक डिझाइनचे शिक्षण घेतले होते आणि क्रोशे कलेत एक यशस्वी व्यवसायही सुरू केला होता. सर्वात धाकटी मुलगी, चार्वी, पूर्वी फुटबॉलपटू होती आणि सुरतमध्ये जिल्हा स्तरावर खेळायची. पण त्यांची धर्माप्रती असलेली भक्ती इतकी प्रबळ होती की, छवीने नोकरी सोडली आणि चार्वीने अध्यात्माचा मार्ग स्वीकारण्यासाठी नववीतच शाळा सोडली.
कुटुंबावर एक आघात अन..
या मोठ्या निर्णयामागे एक मन हेलावणारी कहाणी आहे. दिलीप भाईंच्या पत्नी, ज्योतीबेन सांगतात की, काही काळापूर्वी त्यांच्या पतीचा एक खूप धोकादायक अपघात झाला होता. दिलीप भाईंचा जीव वाचणे अत्यंत कठीण होते, पण त्यांच्या गुरूंच्या आणि देवाच्या कृपेने ते पूर्णपणे सुखरूप घरी परतले. या घटनेने कुटुंबाचा दृष्टिकोन बदलला आणि त्यांना जाणीव झाली की हे सांसारिक जीवन तात्पुरते आहे.
