महिलांच्या बूटाचा वास घेण्यासाठी थेट घरात घुसायचा, CCTV पाहून पोलिसही चक्रावले, कारण ऐकून..
महिलांचे बूट चोरून वास घ्यायचा आणि त्याचे व्हिडिओ करून सोशल मीडियावर टाकायचा; मलेशियातील विद्यापीठीन विद्यार्थ्याचा धक्कादायक प्रकार समोर. कारण काय?
मलेशियामध्ये एका विद्यापीठीन विद्यार्थ्याच्या विचित्र आणि धक्कादायक कृत्याचा पर्दाफाश झाला आहे. महिलांच्या घराबाहेर ठेवलेले बूट चोरून त्यांचा वास घेणे आणि त्याचे व्हिडिओ सोशल मीडियावर पोस्ट करणे असा प्रकार हा विद्यार्थी करत असल्याचा आरोप आहे. सीसीटीव्ही फुटेजमुळे हा प्रकार उघडकीस आला असून पोलिसांनी संबंधित विद्यार्थ्याला अटक केली आहे.
साउथ चायना मॉर्निंग पोस्टच्या वृत्तानुसार, ही घटना मलेशियातील शाह आलम परिसरातील आहे. 22 वर्षीय विद्यार्थिनीने पोलिसांकडे तक्रार केली होती की, गेल्या काही महिन्यांपासून एक अज्ञात व्यक्ती तिचा पाठलाग करत असून तिच्यावर लक्ष ठेवत आहे. मात्र त्या व्यक्तीची ओळख पटत नव्हती.
CCTV मधून समोर आलं सत्य
घराच्या बाहेर लावलेल्या सीसीटीव्ही कॅमेऱ्यात संपूर्ण प्रकार कैद झाला. फुटेजमध्ये काळ्या रंगाचा टी-शर्ट घातलेला एक तरुण फ्लॅटबाहेर येतो, ग्रीलमधून हात घालून बाहेर ठेवलेले बूट काढतो आणि त्यांचा वास घेत असल्याचे स्पष्ट दिसून आले. हा व्हिडिओ सोशल मीडियावर व्हायरल झाल्यानंतर मोठी खळबळ उडाली.
पीडित विद्यार्थिनीच्या म्हणण्यानुसार, एप्रिल महिन्यापासून हा तरुण तिला त्रास देत होता. सीसीटीव्हीमुळे आरोपीची ओळख पटताच तिने पोलिसांत तक्रार दाखल केली. शाह आलम पोलिसांनी तत्काळ कारवाई करत त्याच दिवशी रात्री आरोपीला अटक केली. पोलिसांच्या माहितीनुसार, आरोपीचे वय 20 ते 25 वर्षांच्या दरम्यान असून तोही एका विद्यापीठात शिक्षण घेत आहे. त्याच्यावर यापूर्वी कोणताही गुन्हा दाखल नव्हता आणि घटनेच्या वेळी तो मद्य किंवा अमली पदार्थांच्या प्रभावाखाली नव्हता.
असं करण्यामागे नेमकं कारण काय?
तपासादरम्यान आणखी एक धक्कादायक बाब समोर आली. आरोपी केवळ बुटांचा वास घेत नव्हता तर त्याचे व्हिडिओ तयार करून सोशल मीडियावरही अपलोड करत होता. त्यामुळे पोलिस आता त्याने अशा प्रकारे आणखी किती महिलांना लक्ष्य केले आणि त्याच्याकडे अशा प्रकारचे इतर व्हिडिओ आहेत का, याचा तपास करत आहेत.
या प्रकरणामागील नेमके कारण अद्याप स्पष्ट झालेले नसले तरी तज्ज्ञांच्या मते, अशा प्रकारचे वर्तन मानसिक समस्या, अतिरेकी आकर्षण किंवा विकृत मानसिकतेशी संबंधित असू शकते. त्यामुळे अशा घटनांकडे केवळ विचित्र प्रकार म्हणून न पाहता गांभीर्याने पाहण्याची गरज असल्याचे मत व्यक्त केले जात आहे.
