ऑस्करमध्ये या हॉरर चित्रपटाचा जलवा, जिंकले 14 नामांकन, जगभरात होतेय चर्चा, OTT वर पाहू शकता

जागतिक चित्रपटसृष्टीतील सर्वात प्रतिष्ठेचा मानला जाणारा अकादमी अवॉर्ड्स यंदा एका हॉरर-अॅक्शन चित्रपटामुळे विशेष चर्चेत आला आहे. ‘सिनर्स’ या चित्रपटाने ऑस्करमध्ये तब्बल 16 विविध श्रेणींमध्ये नामांकन मिळवत सर्वांचे लक्ष वेधून घेतले आहे. यामुळे हॉरर चित्रपटांना मोठ्या पुरस्कार सोहळ्यांमध्ये योग्य मान मिळत नाही हा समजही या चित्रपटाने मोडून काढला आहे.

यापूर्वी टायटॅनिक, ला ला लँड आणि ऑल अबाउट इव्ह या चित्रपटांना प्रत्येकी 14 नामांकन मिळाले होते. मात्र, ‘सिनर्स’ या चित्रपटाने हा विक्रम मागे टाकत नवा इतिहास रचला आहे. बेस्ट पिक्चर, बेस्ट डायरेक्टर, बेस्ट अॅक्टर अशा अनेक महत्त्वाच्या श्रेणींमध्ये या चित्रपटाचे नाव आघाडीवर आहे.

1932 च्या पार्श्वभूमीवर उलगडणारी कथा

‘सिनर्स’ या चित्रपटाची कथा प्रेक्षकांना 1932 च्या काळात घेऊन जाते. अमेरिकेतील मिसिसिपी या प्रदेशातील रहस्यमय वातावरणात ही कथा घडते. कथानक दोन जुळ्या भावांभोवती फिरते. पहिल्या महायुद्धानंतर ते शिकागो मधून आपल्या गावात परततात आणि भूतकाळातील कटू आठवणी मागे टाकून नव्याने आयुष्य सुरू करण्याचा प्रयत्न करतात.

ते एका जुन्या आरा मशीनच्या जागी ज्यूक जॉइंट सुरू करून आपल्या समुदायासाठी सुरक्षित जागा निर्माण करण्याचा प्रयत्न करतात. मात्र ज्या शांततेच्या शोधात ते आपल्या गावात परततात, त्याच ठिकाणी त्यांची वाट पाहत असतात भयानक अलौकिक शक्ती आणि भूतांसारखे जीव. त्यानंतर सुरू होतो जीव वाचवण्यासाठीचा थरारक संघर्ष.

दमदार अभिनय आणि दिग्दर्शन

या चित्रपटात मायकेल बी. जॉर्डन यांनी डबल रोल करत उत्कृष्ट अभिनय सादर केला आहे. दोन जुळ्या गुन्हेगारांच्या भूमिकेत त्यांचा संघर्ष आणि भूतांपासून बचाव करण्याचा प्रयत्न प्रेक्षकांना खिळवून ठेवतो.

दिग्दर्शक रायन कूगलर, ज्यांनी यापूर्वी ब्लॅक पँथर सारखा सुपरहिट चित्रपट दिला आहे. त्यांनी यावेळी हॉरर आणि अॅक्शनचा अनोखा संगम साकारला आहे. चित्रपटात हेली स्टेनफेल्ड आणि डेलरॉय लिंडो यांच्याही प्रभावी भूमिका पाहायला मिळतात.

ओटीटीवर पाहता येणार चित्रपट

सुमारे 2 तास 17 मिनिटांचा हा थरारक चित्रपट ओटीटी प्लॅटफॉर्म JioHotstar वर स्ट्रीमिंगसाठी उपलब्ध आहे. हॉरर आणि थ्रिलर प्रकारातील चित्रपट आवडणाऱ्या प्रेक्षकांसाठी ‘सिनर्स’ हा एक वेगळा आणि रोमांचक अनुभव ठरू शकतो.