विमान टेकऑफ-लँडिंगवेळी खिडकीचं शटर का उघडायला सांगतात? जाणून घ्या
विमानाची खिडकीजवळची सीट मिळाली की बाहेर बघायला काय मज्जा येते! पण टेक-ऑफ किंवा लँडिंगच्या वेळी ते खिडकीचं शटर उघडायला का सांगतात, याचा कधी विचार केलाय? हे फक्त बाहेरचं दृश्य दिसावं म्हणून नाही, तर यामागे दडलंय तुमच्या आमच्या सुरक्षेचं एक मोठं कारण! चला, जाणून घेऊया या छोट्याशा नियमामागचं महत्त्वाचं विज्ञान!
विमानाने प्रवास करताना, विशेषतः जर खिडकीजवळची सीट मिळाली असेल, तर बाहेरचं दृश्य बघायला खूप छान वाटतं. पण तुम्ही कधी लक्ष दिलं आहे का, की विमान टेक-ऑफ करताना किंवा लँडिंगच्या वेळी Air Hostess किंवा Cabin Crew आपल्याला खिडकीचं शटर उघडायला सांगतात? अनेकांना वाटतं की हे फक्त बाहेरचं दृश्य बघता यावं यासाठी असेल. पण खरं कारण त्याहून खूप महत्त्वाचं आणि तुमच्या सुरक्षिततेशी निगडीत आहे!
टेक-ऑफ आणि लँडिंग
विमान प्रवासातील टेक-ऑफ आणि लँडिंग हे दोन टप्पे असे आहेत, जिथे अपघाताचा किंवा कोणत्याही प्रकारच्या आणीबाणीचा धोका तुलनेने जास्त असतो. याच वेळी खिडकीचे शटर उघडे ठेवण्याची सूचना दिली जाते. यामागे काही ठोस कारणं आहेत:
1. आपत्कालीन परिस्थितीत बाहेरची स्थिती समजण्यासाठी
जर टेक-ऑफ किंवा लँडिंगच्या वेळी विमानात काही बिघाड झाला, इंजिनमध्ये आग लागली किंवा इतर कोणतीही आपत्कालीन परिस्थिती निर्माण झाली, तर खिडक्या उघड्या असल्यास आत बसलेल्या प्रवाशांना आणि केबिन क्रूला बाहेर काय परिस्थिती आहे, याचा अंदाज येतो. यामुळे मदतकार्य करणाऱ्या टीमलाही आत काय चाललंय हे बाहेरून दिसू शकतं.
2. सुरक्षित बाहेर पडण्याचा मार्ग ठरवण्यासाठी
खिडक्या उघड्या असल्यामुळे, आपत्कालीन परिस्थितीत विमानातून बाहेर कोणत्या बाजूने पडणं सुरक्षित आहे, हे ठरवायला मदत होते. उदाहरणार्थ, जर विमानाला एका बाजूने आग लागली असेल, तर प्रवासी आणि Crew Members दुसऱ्या बाजूच्या दरवाज्याचा वापर करून सुरक्षितपणे बाहेर पडू शकतात. बाहेरची स्थिती स्पष्ट दिसत असल्याने गोंधळ कमी होतो आणि योग्य निर्णय घेता येतो.
3. डोळ्यांना प्रकाशाशी जुळवून घेण्यासाठी
अचानक अंधारातून प्रकाशात किंवा प्रकाशातून अंधारात गेल्यावर आपल्या डोळ्यांना त्रास होतो आणि काही क्षण काहीच दिसत नाही. टेक-ऑफ आणि लँडिंगच्या वेळी खिडक्या उघड्या ठेवल्याने, प्रवाशांचे डोळे बाहेरच्या नैसर्गिक प्रकाशाशी जुळवून घेतात. जर अचानक आपत्कालीन परिस्थितीत विमानातून बाहेर पडावं लागलं, तर डोळे आधीच बाहेरच्या प्रकाशाला सरावलेले असल्याने स्पष्ट दिसत आणि वेगाने हालचाल करता येते.
4. सुरक्षा आणि नियमांचं पालन
विमान कंपन्या आणि आंतरराष्ट्रीय हवाई वाहतूक संघटनांनी प्रवाशांच्या सुरक्षिततेसाठी काही नियम ठरवून दिलेल्या आहेत. टेक-ऑफ आणि लँडिंगच्या वेळी खिडकीचे शटर उघडे ठेवणे हा त्याचाच एक भाग आहे. यामुळे केवळ आपत्कालीन परिस्थितीतच नाही, तर एकूणच प्रवासादरम्यान सुरक्षितता वाढते.
