सावधान! स्वस्ताईतील ऑफर्स करतील बँक खाते रिकामे

नवी दिल्ली | 11 नोव्हेंबर 2023 : सध्या दिवाळीची धूम सुरु आहे. खरेदीचे वातावरण आहे. उत्साह आहे. आनंद ओसंडून वाहत आहे. अनेक कंपन्या, ई-कॉमर्स प्लॅटफॉर्म दिवाळीत विक्रीसाठी ऑफर्सचा भडीमार करत आहेत. पण अनेकदा घरातील कामाच्या व्यस्ततेमुळे घराबाहेर पडणे जमत नाही. ऑनलाईन शॉपिंगचा मोह आवरत नाही. सोशल नेटवर्किंग प्लॅटफॉर्मवर पण अनेक जाहिरातींचा, डिस्काऊंटचा ऊत आला आहे. पण या सर्वच जाहिराती काही तुमचा फायदा करण्यासाठी नसतात. त्यातील काही तर तुम्हाला जाळ्यात ओढून फसवणूक (Diwali Online Scam Alert) करणाऱ्या पण असतात. तेव्हा मोहात कोणत्याही अनाधिकृत वेबसाईटवर, लिंकवरुन खरेदी करु नका. नाहीतर बँकेतील बोनस आणि पगार एकदाच गायब होईल.

Diwali Offer पासून दूर राहा

सायबर गुन्हेगारांनी तुम्हाला फसवण्यासाठी ऑनलाईन जाळे टाकले आहे. खोटा बँक कॉल, खोट्या ऑफर्सचा एसएमएस, ई-मेल यामध्ये आमिषं दाखवले जाते. दिवाळीत अनेकांच्या बँक खात्यात पैसा आलेला आहे. त्याचा फायदा साबर भामटे उचलतात. तुम्हाला सवलतीचे आमिष दाखवून लिंक पाठवण्यात येते. तुम्ही एकदा त्यावर क्लिक केले तर पुढील काही मिनिटात तुमच्या खात्यातील रक्कम गायब होते. काहीप्रकरणात तर कॉलवर काही मिनिटं संभाषण झाल्यानंतर ही बँक खाते खाली झाल्याचे समोर आले आहे. तुमची खासगी माहिती, बँकेचा तपशील चोरुन हा गंडा घातल्या जातो.

या आमिषाला म्हणा ना

सणासुदीच्या काळात डिस्काऊंट, कॅशबॅकची प्रलोभनं दाखविण्यात येतात. अथवा स्क्रॅच कुपन, बक्षीस असे फंडे वापरले जातात. एकावर एक फ्री, कम्बो ऑफर्स अशा अनेक युक्त्या लढवल्या जातात. या व्हायरल मॅसेजच्या तुम्ही एकदा प्रेमात पडला की तुमचा करेक्ट कार्यक्रम केल्या जातो. सुरुवातीला कॉल येतो. मग लिंक पाठवण्यात येते. अथवा तुम्ही थेट लिंकवर क्लिक केले की माहिती चोरुन बँक खाते खाली करण्यात येते. त्यामुळे आशा आमिषांना ना म्हणा. ई-कॉमर्सच्या वेबसाईटची खात्री करुनच मग व्यवहार करा.

Free Gifts Diwali Offers

अशा प्रकारच्या ऑफर्स तुमचे दिवाळीत दिवाळे काढतील. स्कॅमर्स अशा ऑफर्सचा महापूर आणतात. सोशल मीडियावर ज्या पोस्ट असतात. त्यावर फेक अकाऊंटमधून पसंतीच्या कमेंट करण्यात येतात. त्यामुळे आपला त्यावर विश्वास बसतो. त्यांची लिंक क्लिक केली आणि स्क्रोल केले की तुमची शिकार केली जाते.