Aaditya Thackeray | दानपेटीची चोरी करणाऱ्यांसोबत जाणार का? भाजपसोबत जाणाच्या विचारात असलेल्यांना आदित्य ठाकरेंचा सवाल

राज्यातील राजकारणात अलीकडच्या काळात वेगवान घडामोडी घडत असून, विविध पक्षांतील नेत्यांच्या हालचालींमुळे नव्या राजकीय समीकरणांची चर्चा रंगली आहे. उद्धव बाळासाहेब ठाकरे यांच्या शिवसेनेतील काही खासदारांनी एकनाथ शिंदे यांच्या शिवसेनेत प्रवेश केल्यानंतर, विधान परिषदेचे आमदार सचिन अहिर यांनीही शिंदे गटात प्रवेश केला. या पार्श्वभूमीवर राष्ट्रवादी काँग्रेस (शरदचंद्र पवार) पक्ष राष्ट्रीय लोकशाही आघाडीत (NDA) सहभागी होणार असल्याच्या चर्चांना उधाण आले आहे.

याच चर्चांबाबत माध्यमांनी शिवसेना (उद्धव बाळासाहेब ठाकरे) पक्षाचे आमदार आदित्य ठाकरे यांना प्रश्न विचारला. त्यावर प्रतिक्रिया देताना त्यांनी, “हा आमचा प्रश्न नाही, तो संबंधित पक्षाचा प्रश्न आहे. आम्ही आमची भूमिका स्पष्टपणे मांडत आलो आहोत. आज राज्यातील जनता महागाई, वीज, पाणीटंचाई आणि इतर मूलभूत प्रश्नांवर आपला रोष व्यक्त करत आहे,” असे सांगितले.

पुढे बोलताना आदित्य ठाकरे यांनी भाजपसोबत जाण्याच्या चर्चांवर भाष्य करत अप्रत्यक्ष टीका केली. “कोणताही पक्ष, आमदार, खासदार किंवा नगरसेवक अधिकृत अथवा अनधिकृतपणे भाजपसोबत जाण्याचा विचार करत असेल, तर त्यांनी स्वतःला एक प्रश्न विचारावा. राम मंदिरातील दानपेटीच्या कथित चोरीवर प्रश्न उपस्थित होत असताना, अशा लोकांसोबत तुम्ही मांडीला मांडी लावून बसणार का?” असा सवाल त्यांनी उपस्थित केला.

तसेच त्यांनी जंतर-मंतर येथे सुरू असलेल्या आंदोलनाचाही उल्लेख करत, “देशहितासाठी आंदोलन करणाऱ्यांच्या विरोधात उभे राहणार का?” असा प्रश्नही उपस्थित केला.

दरम्यान, राष्ट्रवादी काँग्रेस (शरदचंद्र पवार) पक्षाच्या NDA प्रवेशाबाबत विविध राजकीय चर्चा सुरू असल्या, तसेच काही नेत्यांच्या भेटी झाल्याच्या बातम्या समोर येत असल्या, तरी याबाबत संबंधित पक्षांकडून अद्याप कोणतीही अधिकृत घोषणा किंवा भूमिका जाहीर करण्यात आलेली नाही.