माझे नातेवाईक असले तरी…; अजित पवारांच्या अधिकाऱ्यांना महत्वाच्या सूचना

उपमुख्यमंत्री अजित पवार यांनी बारामती तालुका खरेदी विक्री संघाच्या मेदड येथील भूखंडाशी संबंधित आरोपांवर पत्रकार परिषदेत स्पष्टीकरण दिले. हे प्रकरण ९ वर्षांच्या कायदेशीर प्रक्रियेतून पूर्ण झाले होते, असे त्यांनी सांगितले. ९४ साली भूखंडासाठी प्रस्ताव, ग्रामपंचायतीचा ठराव, जिल्हाधिकाऱ्यांकडे कागदपत्रे सादर करणे आणि २००३ मध्ये १.५ लाख रुपयांना भूखंड ताब्यात मिळणे या गोष्टींची त्यांनी माहिती दिली. २०२० मध्ये भूखंडावर गोडाऊन किंवा मंगल कार्यालय उभारण्याचा विचार असल्याचेही ते म्हणाले.

पवार यांनी स्पष्ट केले, की जर या प्रकरणात काही गैरव्यवहार झाल्याचे पुरावे असतील, तर त्याची निःपक्षपाती चौकशी व्हायला हवी. माझे नातेवाईक असले तरी अधिकाऱ्यांनी दबावात काम करू नये, असे ते म्हणाले. त्यांनी स्वतःवर झालेले आरोप फेटाळून लावले आणि निवडणुकीच्या काळात आपल्याला बदनाम करण्याचा प्रयत्न केला जात असल्याचे म्हटले. कायद्यानुसार सत्य समोर यावे अशी त्यांची भूमिका आहे.