Ajit Pawar : अजून त्यांच्या लक्षात येईना की ते काँग्रेसमध्ये नाही तर शिवसेनेत आहोत… दादांचा धंगेकरांना टोला
अजित पवार यांनी धंगेकरांना उद्देशून म्हटले की, त्यांनी आता काँग्रेसमध्ये नसून शिवसेना (धनुष्यबाण) पक्षात आणि एकनाथ शिंदे यांच्या नेतृत्वाखाली असल्याचे भान ठेवावे. महायुती सरकारमधील मित्रपक्षांनी आघाडीधर्माचे पालन करावे, असा सल्लाही त्यांनी दिला. घायवळ प्रकरणावरून केलेल्या आरोपांच्या पार्श्वभूमीवर हे विधान आले आहे.
महाराष्ट्राच्या राजकारणात अजित पवार यांनी मित्रपक्षांना महत्त्वाचा संदेश दिला आहे. घायवळ प्रकरणात रविंद्र धंगेकर यांनी चंद्रकांत पाटलांवर आरोप केल्यानंतर अजित पवार यांनी रविंद्र धंगेकर यांच्यावर टोला लगावला. धंगेकरांना उद्देशून दादा म्हणाले की, “धंगेकरांच्या अजून लक्षातच येत नाही की आता आपण काँग्रेसमध्ये नाही, आपण शिवसेनेत आहे, धनुष्यबाणामध्ये आहे आणि आपले नेते हे एकनाथराव शिंदे साहेब आहेत.”
अजित पवारांनी स्पष्ट केले की, महायुतीमधील सर्व घटक पक्षांनी मित्रपक्षांचे भान राखणे आवश्यक आहे. ते म्हणाले, “एकनाथराव शिंदे सांगतील की आपलं मित्रपक्षांचं हे महायुतीचं सरकार आहे. मित्रपक्षाचं भान हे कृपा करून सगळ्यांनी माझ्या पक्षाच्या कार्यकर्त्यांनी आणि नेत्यांच्या सहित सगळ्यांनी ठेवावं.” महायुती सरकारमध्ये काम करताना सर्वांनी एकमेकांचा आदर राखत आणि आघाडीधर्माचे पालन करत काम करावे, असे आवाहन अजित पवार यांनी केले आहे. या विधानामुळे महायुतीमधील अंतर्गत समन्वयावर पुन्हा एकदा लक्ष वेधले गेले आहे.
