Ajit Pawar Funeral Updates : अजित पवार यांचा रथातून शेवटचा प्रवास; कार्यकर्त्यांची गर्दी

अजित पवार यांच्या अकाली निधनाने महाराष्ट्रावर शोककळा पसरली आहे. त्यांचे पार्थिव फुलांनी सजवलेल्या रथातून काटेवाडी येथील निवासस्थानाहून बारामती येथील विद्या प्रतिष्ठानच्या मैदानाकडे अखेरच्या प्रवासासाठी नेण्यात येत आहे. या रथावर अजित पवारांचा हसरा फोटो लावलेला असून, स्वर्गीय अजितदादा पवार अमर रहे असे घोषवाक्य लिहिलेले आहे. संपूर्ण महाराष्ट्राला आणि राष्ट्रवादी काँग्रेसला पोरके करून अजित पवार निघून गेल्याची भावना कार्यकर्त्यांमध्ये आहे.

शरद पवार आणि प्रतिभाताई पवार यांच्यासाठी हा एक मोठा धक्का आहे, कारण प्रतिभाताई नेहमीच अजित पवारांना मुलाप्रमाणे मानत असत आणि मतभेदांच्या वेळी संवाद साधत असत. राज्याचे मंत्रिमंडळ, महत्त्वाचे नेते आणि राज्यभरातील कार्यकर्ते अजित पवारांना अखेरचा निरोप देण्यासाठी बारामती आणि काटेवाडी येथे दाखल झाले आहेत. प्रत्येकाच्या डोळ्यात पाणी आणि मनात दुःख आहे. विधिमंडळातील सहकारी आणि तरुण आमदारांनी त्यांच्या कार्याला आणि मार्गदर्शनाला उजाळा दिला. अजित पवारांचे निधन ही पवार कुटुंबासाठी आणि राज्याच्या राजकारणासाठी एक मोठी हानी मानली जात आहे.