CM Relief Fund : दानवे-फडणवीसांमध्ये मुख्यमंत्री सहायता निधीवरून जुंपली, शेतकऱ्यांच्या मदतीवरून राजकारण तापलं

मुख्यमंत्री सहायता निधीतील शेतकऱ्यांच्या मदतीच्या आकडेवारीवरून विधान परिषदेचे विरोधी पक्षनेते अंबादास दानवे आणि उपमुख्यमंत्री देवेंद्र फडणवीस यांच्यात शाब्दिक युद्ध सुरू झाले आहे. अंबादास दानवेंनी आरोप केला की, मुख्यमंत्री सहायता निधीत अब्जावधी रुपये जमा झाले असले तरी, शेतकऱ्यांना केवळ ७५ हजार रुपये मदत मिळाली आहे. ही माहिती माहिती अधिकारातून समोर आल्याचे दानवेंनी म्हटले. या आरोपावर मुख्यमंत्री कार्यालयाने तात्काळ स्पष्टीकरण देत दानवेंनी दिलेली आकडेवारी चुकीची असल्याचे म्हटले. मुख्यमंत्री कार्यालयानुसार, केवळ एका महिन्याची आकडेवारी देऊन गैरसमज पसरवला जात आहे. ऑक्टोबर ते डिसेंबर या तीन महिन्यांत मुख्यमंत्री सहायता निधीतून ६१ कोटी ५१ लाख ६९८ रुपये इतकी मदत वितरित करण्यात आली आहे. या चुकीच्या माहितीची चौकशी करून दोषींवर कारवाई केली जाईल, असेही कार्यालयाने स्पष्ट केले. मुख्यमंत्री सहायता निधीव्यतिरिक्त मदत आणि पुनर्वसन विभागासह विविध खात्यांकडून शेतकऱ्यांना १४ हजार कोटींपेक्षा अधिकची मदत थेट खात्यात जमा करण्यात आल्याचेही सरकारने सांगितले. दानवेंनी या चौकशी अंती कारवाईची प्रतीक्षा करत असल्याचे उत्तर दिले आहे.