मराठी सक्तीची मुदत थेट एका वर्षापर्यंत वाढवण्यामागे नेमका हेतु काय? अंजली दमानियांच्या वक्तव्याची तुफन चर्चा

अंजली दमानिया यांनी नुकतीच प्रतिक्रिया व्यक्त करत देवेंद्र फडणवीस यांनी प्रताप सरनाईक यांना कसे ओव्हररुल केले, हे आपण पाहिल्याचे म्हटले आहे. रिक्षा आणि टॅक्सी चालकांना स्थानिक भाषा येणे अत्यंत आवश्यक असल्याचे दमानियांचे मत आहे. त्यांच्या मते, अगदी जुजबी संवादासाठी आणि एकामेकांशी होणाऱ्या सामान्य संवादासाठी मराठी भाषा येणे गरजेचे आहे आणि या मताशी त्या स्वतः सहमत आहेत. फडणवीसांनी रिक्षा-टॅक्सी चालकांना दिलेली एक महिन्याची मुदत थेट एका वर्षापर्यंत वाढवण्यामागे काय हेतू आहे, यावरही दमानियांनी प्रश्नचिन्ह उपस्थित केले.

ही मुदतवाढ राजकीय कारणांसाठी आहे की सरनाईकांना चेकमेट करण्यासाठी, यावर त्यांना काही बोलायचे नाही, असे त्यांनी स्पष्ट केले. मात्र, या सर्व गोष्टी राजकारणाचा भाग असल्याचे त्यांनी सूचित केले. महाराष्ट्रात सध्या देवेंद्र फडणवीस, सुनेत्रा पवार आणि एकनाथ शिंदे यांच्यात सत्तेसाठी चाललेला संघर्ष काही दिवसांपासून संपूर्ण राज्य पाहत असल्याचे दमानिया यांनी नमूद केले. फडणवीसांनी सरनाईकांना ओव्हररुल केल्याचा प्रसंगही या मोठ्या राजकीय संघर्षाचाच एक भाग असू शकतो, असे त्यांचे अप्रत्यक्ष मत होते. त्यांच्या या प्रतिक्रियेमुळे राज्यातील राजकीय घडामोडींमध्ये पुन्हा एकदा चर्चांना उधाण आले आहे.