Satish Bhosale : खोक्याचं पोलिस कोठडीत अन्नत्याग आंदोलन, केली ही मोठी मागणी

शिरूर कासारच्या मारहाण प्रकरणातील आरोपी आणि आमदार सुरेश धस यांचा कार्यकर्ता सतीश उर्फ खोक्या भोसले याने पोलीस कोठडीत अन्नत्याग आंदोलन सुरू केलं आहे.

शिरूर कासार येथील ढाकणे पिता पुत्राला मारहाण केल्या प्रकरणी आमदार सुरेश धस यांचा कार्यकर्ता खोक्या भोसले याला पोलिसांनी अटक केलेली आहे. त्याच्यावर हरणांची शिकार केल्याचा देखील आरोप आहे. या संपूर्ण प्रकरणानंतर वन विभागाने खोक्या भोसले याचं घरं अतिक्रमण असल्याचं सांगत त्यावर तोडक कारवाई केली होती. त्यानंतर काही अज्ञात इसमांनी सतीश भोसलेच्या घरावर हल्ला करून घर जाळलं. तसंच त्याच्या कुटुंबाला मारहाण देखील केली. याच संदर्भात आता खोक्याने कोठडीत अन्नत्याग आंदोलन सुरू केलं आहे. घर जाळणाऱ्या आरोपींना अटक करून त्यांच्यावर कारवाई करावी अशी मागणी त्याने केली आहे. पोक्सो, अॅट्रॉसिटी गुन्ह्यातील आरोपींना अटक होत नाही आणि न्याय मिळत नाही तोवर आपण अन्नत्याग आंदोलन सुरू ठेवणार असल्याचं म्हंटलं आहे.