रस्ते आहेत तर अपघात होणारच; भोरमधील बालकाच्या मृत्यूनंतर शंकर मांडेकरांच्या विधानाने खळबळ

भोरमध्ये रस्त्यांवरील खड्ड्यांमुळे ११ वर्षीय बालकाचा हृदयद्रावक मृत्यू झाल्याच्या घटनेनंतर राष्ट्रवादी काँग्रेसचे आमदार शंकर मांडेकर यांनी एक अत्यंत वादग्रस्त विधान केले आहे. “रस्ते आहेत तर अपघात होणारच” असे मांडेकर यांनी म्हटले आहे, ज्यावरून राज्यभरातून तीव्र प्रतिक्रिया उमटत आहेत. या घटनेमुळे नागरिक आणि माध्यम प्रतिनिधींकडून रस्त्यांच्या दुर्दशेबद्दल आणि प्रशासनाच्या बेफिकिरीबद्दल प्रश्न विचारले जात असताना, मांडेकर यांनी पत्रकारांशी संवाद साधताना हे विधान केले.

त्यांनी आपली जबाबदारी नाकारत, प्रशासन आणि व्यवस्थेवर ढकलण्याचा प्रयत्न केला. “दोषी कोण आहे हे म्हणण्यापेक्षा शेवट एखादा अपघात घडला ज्याची मोठी गाडी आहे त्याच्यावर गुन्हा दाखल होतो,” असे ते म्हणाले. पत्रकारांनी त्यांना बेजबाबदार उत्तर न देण्यास सांगितल्यावर, मांडेकर यांनी आपण आमदार असून जबाबदारीने बोलत असल्याचे म्हटले. गेली दोन वर्षे आपण अधिवेशनात हा मुद्दा मांडत असल्याचेही त्यांनी नमूद केले, पण समस्या न मिटल्याबद्दल त्यांनी “गव्हर्नमेंट आहे, मी तरी काय करणार त्याला?” असा प्रश्न उपस्थित केला. त्यांच्या या वक्तव्यामुळे जनमानसात संतापाची लाट उसळली आहे.