Bihar Election 2025 : बिहार निवडणूक, पोटनिवडणुकीच्या तारखा जाहीर, असं होणार मतदान?

बिहार विधानसभा निवडणुका आणि आठ राज्यांमधील पोटनिवडणुकांचे वेळापत्रक जाहीर झाले आहे. बिहारमध्ये ६ नोव्हेंबरला पहिल्या टप्प्यातील मतदान होणार असून, ११ नोव्हेंबरला दुसऱ्या टप्प्यात मतदान प्रक्रिया पार पडेल. यासोबतच, देशातील आठ महत्त्वाच्या विधानसभा मतदारसंघांसाठी पोटनिवडणुकाही घेण्यात येणार आहेत.

या पोटनिवडणुका जम्मू आणि काश्मीरमधील बडगाम व नगरोटा, राजस्थानमधील अंता, झारखंडमधील घाटशिला, तेलंगणामधील ज्युबिली हिल्स, पंजाबमधील तरनतारण, मिझोराममधील डम्पा आणि ओडिशामधील नुआपाडा येथे होतील. या सर्व पोटनिवडणुकांसाठी मतदान ११ नोव्हेंबर रोजी निश्चित करण्यात आले आहे.

सर्व विधानसभा निवडणुका आणि पोटनिवडणुकांची मतमोजणी १४ नोव्हेंबर रोजी एकाच वेळी केली जाईल. मतदारांना आवाहन करण्यात आले आहे की त्यांनी आपले नाव मतदार यादीत तपासावे. जर नावामध्ये काही त्रुटी असतील किंवा नाव सुटले असेल, तर नामनिर्देशन पत्र भरण्याच्या १० दिवस आधीपर्यंत ते मतदार यादीत समाविष्ट करता येईल. मतदारांनी या सूचनेचे पालन करून आपला मतदानाचा हक्क बजावण्यासाठी सज्ज राहावे.