BJP Nepotism : भाजपात घराणेशाही सुसाट अन् कार्यकर्ते सपाट? तिकीटात नेत्याच्या गोतावळ्याची यादी, BJP नव्या रेकॉर्डच्या तयारीत?

स्थानिक स्वराज्य संस्थांच्या निवडणुकांमध्ये भारतीय जनता पार्टीने (भाजप) घराणेशाहीचे सर्व विक्रम मोडून काढण्याच्या तयारीत असल्याचे बोलले जात आहे. सोशल मीडियावर व्हायरल झालेल्या एका यादीनुसार, भाजपने अनेक नेत्यांच्या नातलगांना उमेदवारी दिली आहे. एरवी घराणेशाहीवर टीका करणारा भाजपच आता टीकेच्या केंद्रस्थानी आला आहे. जामनेरमध्ये मंत्री गिरीश महाजन यांच्या पत्नी साधना महाजन, भुसावळमध्ये मंत्री संजय सावकारे यांच्या पत्नी रजनी सावकारे आणि खामगावमध्ये मंत्री आकाश फुंडकर यांच्या वहिनी अर्पणा फुंडकर यांना नगराध्यक्ष पदाची तिकीट देण्यात आली आहेत.

याव्यतिरिक्त यवतमाळमध्ये अशोक उइके यांची मुलगी, चाळीसगावात आमदार मंगेश चव्हाण यांच्या पत्नी आणि आंबेजोगाईमध्ये आमदार नमिता मुंदडा यांच्या सासऱ्यांसह अनेक आजी-माजी आमदार आणि मंत्र्यांच्या कुटुंबीयांना उमेदवारी मिळाली आहे. या तिकीटवाटपामुळे निष्ठावंत कार्यकर्त्यांना डावलले गेल्याची भावना आहे, तर काही ठिकाणी तिकीट कापल्याने कार्यकर्त्यांनी भाजपचे आभार असे बॅनरही लावले आहेत. भाजपने मात्र केवळ पाच टक्के ठिकाणीच कुटुंबियांना संधी दिल्याचे सांगत विरोधकांनी आत्मपरीक्षण करण्याचा सल्ला दिला आहे.