BJP : भाजपमध्ये मोठा संघटनात्मक फेरबदल; महाराष्ट्राच्या प्रभारीपदी कोणाची वर्णी

भारतीय जनता पक्षाने (भाजप) नुकतीच प्रदेश प्रभारी पदांची नवीन यादी जाहीर केली आहे. या महत्त्वपूर्ण फेरबदलामुळे पक्षाच्या संघटनात्मक रचनेत मोठे बदल झाले आहेत. यादीनुसार, माजी खासदार वैजयंत पांडा यांची महाराष्ट्राचे प्रभारी म्हणून नियुक्ती करण्यात आली आहे. त्यांना सहकार्य करण्यासाठी अमित मालवीय, सदानंद तानवडे आणि कमलजीत सहरावत यांची सहप्रभारी म्हणून नेमणूक झाली आहे.

याचबरोबर, अन्य महत्त्वाच्या राज्यांसाठीही नव्या जबाबदाऱ्या सोपवण्यात आल्या आहेत. विनय सहस्त्रबुद्धे यांच्याकडे दिल्ली प्रदेश प्रभारी पदाची जबाबदारी देण्यात आली आहे, तर विनोद तावडे उत्तर प्रदेशच्या प्रभारी पदाची धुरा सांभाळतील. उत्तर प्रदेशमध्ये त्यांना राज्यसभेच्या खासदार मेधा कुलकर्णी या सहप्रभारी म्हणून मदत करतील.

गोवा राज्याच्या प्रभारी पदाची जबाबदारी खासदार भारती पवार यांच्याकडे देण्यात आली आहे. गोव्यात पुढील वर्षी विधानसभा निवडणुका होणार असल्याने ही नियुक्ती महत्त्वाची मानली जात आहे. या नियुक्त्या आगामी निवडणुका आणि पक्षाच्या संघटनात्मक विस्ताराच्या दृष्टीने महत्त्वाच्या मानल्या जात आहेत.