Dombivli | गेल्या ३ तासांपासून प्रयत्न सुरू; मात्र डोंबिवलीजवळ घसरलेली लोकल रुळावर येईना

मध्य रेल्वेवर आज सकाळी ऐन गर्दीच्या वेळी एक मोठा अपघात झाला. डोंबिवलीजवळ कळवा कारशेडकडून येणाऱ्या रिकाम्या लोकलचा एक डबा अचानक रुळावरून घसरला. या घटनेमुळे सीएसएमटीच्या दिशेने जाणारी वाहतूक विस्कळीत झाली.

घटनेची माहिती मिळताच रेल्वे अधिकारी आणि तांत्रिक पथक तातडीने घटनास्थळी दाखल झाले. गेल्या अडीच ते तीन तासांपासून डबा पुन्हा रुळावर आणण्याचे काम सुरू आहे. या बिघाडामुळे अनेक लोकल गाड्या १५ ते २० मिनिटे उशिराने धावत आहेत.

कामावर जाण्याची वेळ असल्याने डोंबिवली, कल्याण आणि ठाकुर्ली स्थानकांवर प्रवाशांची मोठी गर्दी झाली. काही प्रवासी वेळेवर पोहोचण्यासाठी ट्रॅकवरून चालत जात असल्याचेही दिसले. दरम्यान, काही गाड्या रद्द होण्याची शक्यता वर्तवली जात असून प्रवाशांनी रुळांवरून चालू नये तसेच पर्यायी व्यवस्था करण्याचे आवाहन करण्यात आले आहे.