Chhatrapati sambhajinagar : ऑक्टोबरच्या सुरुवातीलाच उन्हाचा तडाखा; छत्रपती संभाजीनगरमध्ये 37°C; 5 वर्षांचा विक्रम मोडला

छत्रपती संभाजीनगरमध्ये ऑक्टोबर महिन्याच्या सुरुवातीलाच उन्हाचा तीव्र चटका जाणवू लागला आहे. शहरातील तापमानाने मागील पाच वर्षांतील सर्व विक्रम मोडीत काढले आहेत. शुक्रवारी शहरात कमाल तापमान तब्बल 37 अंश सेल्सिअसवर नोंदवले गेले. विशेष म्हणजे, 1 ऑक्टोबर रोजी नोंदवला गेलेला तापमानाचा विक्रम अवघ्या एका दिवसात, म्हणजे 2 ऑक्टोबर रोजी पुन्हा मोडण्यात आला.

गेल्या दोन महिन्यांहून अधिक काळ पाऊस न झाल्यामुळे सप्टेंबरमध्येही तापमानात लक्षणीय वाढ झाली होती. आता ऑक्टोबरच्या सुरुवातीलाच पारा 37 अंश सेल्सिअसवर पोहोचल्याने नागरिक मोठ्या चिंतेत आहेत. अजून पूर्ण हिवाळा आणि त्यापाठोपाठ उन्हाळा बाकी असल्याने, उन्हाळ्यात तापमानाची तीव्रता काय असेल, याचा अंदाज वर्तवणे कठीण झाले आहे. पावसाच्या कमतरतेमुळे तापमानात सातत्याने वाढ होत असल्याचे दिसून येत आहे.

या वाढत्या तापमानामागे मोसमी वाऱ्यांनी घेतलेली माघार हे देखील एक प्रमुख कारण असल्याचे हवामान तज्ज्ञांकडून सांगितले जात आहे. अगदी हिवाळ्यापासूनच तापमान वाढत असल्याचा अनुभव नागरिक घेत आहेत. छत्रपती संभाजीनगरमधील या विक्रमी ऑक्टोबर हीटमुळे स्थानिक प्रशासनासह नागरिकांनाही उपाययोजना करण्याची गरज भासू लागली आहे.