अमित शाह यांच्यासोबतच्या बैठकीत नेमकं काय झालं? मुख्यमंत्र्यांचं थेट ट्विट, म्हणाले…

मुंबई : मुख्यमंत्री एकनाथ शिंदे आणि उपमुख्यमंत्री देवेंद्र फडणवीस हे दोघेही का दिल्लीवारीला गेले होते. यावेळी या दोन्ही नेत्यांनी दिल्लीत केंद्रीय गृहमंत्री अमित शाह यांची भेट घेतली आणि यांच्यात दोन तास बैठक झाली. या बैठकीत नेमकं काय झालं याची माहिती एकनाथ शिंदे यांनी ट्विट करून दिली आहे. मख्यमंत्री शिंदे यांनी केलेल्या ट्विटमध्ये ते म्हटले, ‘कृषि, सहकार विभागाशी संबंधित विविध बाबींवर आम्ही चर्चा केली. राज्यात शेतकरी, महिला सक्षमीकरण अशा विविध क्षेत्रात गतीने कामे सुरू असून अनेक रखडलेले प्रकल्प मार्गी लावले आहेत. राज्यातील विविध प्रकल्पांसाठी प्रधानमंत्री नरेंद्र मोदी यांचे नेहमीच मार्गदर्शन लाभले आहे, सहकार विभागाशी संबंधित बाबींवर केंद्रीय सहकार शाह यांचे आम्हाला नेहमीच मार्गदर्शन लाभत असल्याने ही भेट घेतली. राज्यात आगामी सर्व निवडणुका शिवसेना आणि भाजपने एकत्रितपणे लढविण्याचा निर्णय देखील या बैठकीत घेण्यात आला. महाराष्ट्राच्या विकासासाठी आमची युती ही भक्कम असून गेल्या ११ महिन्यांपासून आम्ही विकासाचे विविध निर्णय घेऊन त्याची अंमलबजावणी केली आहे, रखडलेले प्रकल्प मार्गी लावत आहोत. यापुढच्या काळात सर्वच क्षेत्रात महाराष्ट्राला देशात प्रथम क्रमांकाचे राज्य बनविण्यासाठी, विकासाची घोडदौड अशीच सुरू ठेवण्यासाठी आम्ही एकत्रित निवडणुका लढविणार आणि बहुमताने जिंकणार….’, असे त्यांनी म्हटले आहे.