CM Fadnavis : महाराष्ट्रात बाळासाहेब ठाकरे एकच ब्रँड, ब्रँड सांगणाऱ्यांचा बँड वाजवू…फडणवीस यांचा ठाकरे बंधूंवर थेट निशाणा

मुंबई महापालिका निवडणुकांच्या पार्श्वभूमीवर राजकीय घडामोडींना वेग आला आहे. याच दरम्यान, राज ठाकरे आणि उद्धव ठाकरे या ठाकरे बंधूंची पहिली संयुक्त मुलाखत संजय राऊत आणि महेश मांजरेकर यांनी घेतली आहे. ही मुलाखत आज सकाळी आठ वाजता प्रसारित होणार आहे. या मुलाखतीआधीच मुख्यमंत्री देवेंद्र फडणवीस यांनी ठाकरे बंधूंवर अप्रत्यक्ष निशाणा साधला. फडणवीस म्हणाले, “या महाराष्ट्रामध्ये एकच ब्रँड होता, हिंदू हृदयसम्राट शिवसेनाप्रमुख बाळासाहेब ठाकरे. आता यानंतर महाराष्ट्रामध्ये कोणी ब्रँड नाही.” तसेच, “स्वतःला ब्रँड सांगणाऱ्यांचा बँड वाजवू,” असा इशाराही त्यांनी दिला. महायुती (भाजप-शिवसेना) मजबूत असून, कोणीही स्वतःला ब्रँड मानून समोर आल्यास त्याचा “बँड वाजवल्याशिवाय थांबणार नाही,” असे फडणवीसांनी स्पष्ट केले.

दुसरीकडे, भाजपचे महेश लांडगे यांनी अजित पवारांवर भ्रष्टाचाराचे गंभीर आरोप केले. “अजित पवार महाराष्ट्रातील भ्रष्टाचाराचे आका आहेत,” असे ते म्हणाले आणि “भ्रष्टाचार लपवण्यासाठी ते भाजपसोबत आले का?” असा प्रश्न विचारला. यावर अजित पवारांनी “15 तारखेनंतर जनता ठरवेल कोण काय आहे,” असे उत्तर दिले. आगामी काळात शिवतीर्थावर ठाकरे गटाची, मनसे आणि राष्ट्रवादीची ऐतिहासिक सभा होणार असून, उल्हासनगरमध्ये गुंडाराज चालणार नाही, असेही फडणवीसांनी नमूद केले.