‘लाडकी बहीण’वरून रवी राणा, महेश शिंदेंच्या वक्तव्यानं वाद पेटला, मुख्यमंत्री कॅबिनेटमध्ये मंत्र्यांना भरला दम

मुख्यमंत्री माझी लाडकी बहीण योजनेवरून अमरावतीचे आमदार रवी राणा आणि शिंदेंचे आमदार महेश शिंदे यांनी केलेल्या वक्तव्यामुळे राज्यात नवा वाद सुरू झाला. आमदार रवी राणा आणि शिंदेंचे आमदार महेश शिंदे य दोघांच्या वक्तव्यानंतर मुख्यमंत्री एकनाथ शिंदे आणि दोन्ही उपमुख्यमंत्री देवेंद्र फडणवीस आणि अजित पवार यांनी मंत्रिमंडळ बैठकीत मंत्र्यांना दम भरला आहे. मुख्यमंत्री माझी लाडकी बहीण योजनेचा अपप्रचार होईल, असे वक्तव्य करू नका. रवी राणा यांच्यासारखे आमदार ज्याप्रकारे भाष्य करतात ते चुकीचं आहे. अशा वक्तव्याचा विरोधकांनाच फायदा होतो, असे एकनाथ शिंदे म्हणाले. तर, लोकांमध्ये गैरसमज पसरवणाऱ्या आमदारांना वेळीच तंबी द्या, अशा सूचनाही एकनाथ शिंदे यांनी दिल्यात. यासोबत मुख्यमंत्री माझी लाडकी बहीण योजनेबाबत चांगला प्रचार करा, असे एकनाथ शिंदे यांनी आदेश दिले आहेत.