नकली शिष्य, आनंद दिघेंनी सांगूनही राजीनामा… मुख्यमंत्री शिंदेंचे राजन विचारेंवर गंभीर आरोप

राजन विचारे हे आनंद दिघे यांचे नकली शिष्य आहेत. आनंद दिघे यांनी राजन विचारे यांना सभागृह नेतेपदाचा राजीनामा दिला नाही. तर धर्मवीर या चित्रपटात राजन विचारे यांच्याबद्दल जे काही दाखवलं आहे, ते खोटं असल्याचे म्हणत मुख्यमंत्री एकनाथ शिंदे यांनी राजन विचारे यांच्यावर गंभीर आरोप केला आहे. धर्मवीर या चित्रपटाच्या दुसऱ्या भागात सर्व खरं समोर येईल, असेही म्हणत एकनाथ शिंदे यांनी हा मोठा गौप्यस्फोट केला आहे. चित्रपटात दाखवलं होतं की राजन विचारे हे स्वत:हून आले आणि त्यांनी राजीनामा दिला. पण हे सगळं खोटं आहे. दिघे साहेबांनी त्याला राजीनामा द्यायला सांगितला, तेव्हा त्याने तो दिला नव्हता. तो रघुनाथ मोरे यांच्याकडे गेला आणि म्हणाला, हे काय चालू आहे? माझं पद काढून घेतायत. मोरे साहेब खूप समजुतदार होते. ते म्हणाले की दिघेंनी काही निर्णय घेतला असेल तर तो जाणीवपूर्वक घेतला असेल. तू बिलकुल इथे तिथे काही बोलू नकोस. पण तो सगळं बोलला, दिघे साहेबांनाही बोलला. मला पद नकोच होतं. मी शेवटी साहेबांना सांगितलं की असं करू नका. तेव्हा साहेबांनी त्याला बोलावलं आणि त्यांच्या भाषेत आनंदाश्रमामधील आतल्या खोलीमध्ये समजावलं. हे करायला लागलं. आम्ही सिनेमात जे दाखवलं ते एवढं उलटं आणि एकदम चांगलं दाखवलं. पण तो चांगला नाही, असं म्हणत शिंदेंनी हा मोठा गौप्यस्फोट केला.