Maharashtra Drought : बळीराजाचा दसरा-दिवाळी काळी होऊ देणार नाही! शिंदेंची मोठी ग्वाही, पुढे म्हणाले…

उपमुख्यमंत्री एकनाथ शिंदे यांनी दुष्काळग्रस्त शेतकऱ्यांना दिलासा देण्यासाठी तातडीने उपाययोजना जाहीर केल्या आहेत. मंत्रिमंडळाच्या बैठकीत दुष्काळसदृश्य परिस्थितीवर सखोल चर्चा झाली आणि शिंदे यांनी सकारात्मक भूमिका घेतली. दुष्काळ जाहीर करण्याची प्रक्रिया एक-दोन दिवसांत पूर्ण होईल, असे त्यांनी सांगितले.

उद्यापासून तालुका पातळीवरील ग्रामसेवक, तलाठी आणि कृषी सेवकांना तात्काळ पंचनामे सुरू करण्याचे निर्देश देण्यात आले आहेत. सरकार बळीराजाच्या पाठीशी उभे असून, शेतकऱ्यांचे दसरा-दिवाळी सण काळे होऊ देणार नाही, अशी ग्वाही शिंदे यांनी दिली. जिल्हाधिकारी आणि इतर अधिकारी बांधावर जाऊन नुकसानीची पाहणी करतील आणि युद्धपातळीवर मदत दिली जाईल. पिण्याच्या पाण्याचे नियोजन, चारा छावण्या उभारणे, तसेच जनावरांच्या चाऱ्याला प्राधान्य देणे यावरही सरकारने भर दिला आहे. केंद्र सरकारकडूनही मदत मागितली जाईल, असेही उपमुख्यमंत्र्यांनी नमूद केले.