मलाही संपवण्याचा कट! धनंजय मुंडे यांचा खळबळजनक दावा

परळी नगर परिषद निवडणुकीच्या पार्श्वभूमीवर, आमदार धनंजय मुंडे यांनी एका प्रचार सभेत खळबळजनक दावा केला आहे. विरोधक केवळ माझे राजकारण संपवण्याचा प्रयत्न करत नाहीत, तर मलाच संपवण्याच्या मागे लागले आहेत, असे ते म्हणाले. परळीच्या बरकत नगर येथील सभेत बोलताना, मुंडे यांनी मतदारांना भावनिक साद घातली.

मुंडे यांनी आपल्या भाषणात बरकत नगरमध्ये केलेल्या विकासकामांची आठवण करून दिली. सर्वे क्रमांक ७५ मधील जागेचा विकास, अल्पसंख्याक समाजासाठी इमारतींचे नूतनीकरण, अभ्यासिका आणि आयटीआय स्थापन करण्याच्या योजना त्यांनी मांडल्या. यासाठी २५ कोटी रुपयांचा निधी आणण्याची ग्वाही त्यांनी दिली. राष्ट्रवादी काँग्रेसकडे अल्पसंख्याक विभागाचे मंत्रालय असल्याने हे शक्य होईल, असे ते म्हणाले. त्यांनी उपस्थित मतदारांना गडबड न करण्याचे आणि त्यांच्यासोबत एकजुटीने उभे राहण्याचे आवाहन केले.